ကျွန်တော့်ကလေးတွေအပါအဝင် မိသားစုဝင်ခြောက်ယောက်လုံး သေဆုံးသွားတယ်

မုန်လိုင်ခက်ရွာ စစ်ဘေးဒုက္ခသည်စခန်းတိုက်ခိုက်ခံရလို့ သေဆုံးသွားတဲ့သူတွေထဲ ဦးမရန်ဘောက်လာရဲ့ သားသမီးသုံးယောက်အပါအဝင် မိသားစု တစ်စုလုံးပါသွားပါတယ်။ တောင်ယာစိုက်ဖို့ နေရပ်ပြန်နေတုန်း အဖြစ်ဆိုးနဲ့ ကြုံရတာမို့ သူပြန်လာချိန်မှာ မိသားစုအားလုံးရဲ့ အလောင်းပဲတွေ့ရပါတော့တယ်။ ဒီလိုရက်ရက်စက်စက်တိုက်ခိုက်ခဲ့တဲ့ စစ်ကောင်စီကို နိုင်ငံတကာကအရေးယူဖို့လည်း သူကတောင်းဆိုပါတယ်။ တစ်မိသားစုလုံးမှာ တစ်ယောက်ပဲကျန်ခဲ့တဲ့ ဦးမရန်ဘောက်လာကို RFA သတင်းထောက် စောဖိုးခွားက ကချင်စကားပြန်ကနေတဆင့် မေးမြန်းထားပါတယ်။

မေး - မနေ့က မုန်လိုင်ခက်စခန်းတိုက်ခိုက်ခံရမှုမှာ ဦးမရန်ဘောက်လာရဲ့ မိသားစုဝင်တွေအားလုံးသေဆုံးသွားရတယ်လို့သိရပါတယ်။ ဘယ်နှယောက် ဆုံးရှုံးသွားလဲ။

ဖြေ - ကျွန်တော် မိသားစုဝင်ခြောက်ယောက်ပါသွားပါတယ်။ ကျွန်တော့်အမေ အသက် ၆ဝ ကျော်၊ ကျွန်တော့်မိန်းမက အသက် ၃ဝ၊ ကျွန်တော့်ကလေး သုံးယောက်ပါသွားတယ်။ ယောကျာ်းလေး ၁၄ နှစ်တစ်ယောက်နဲ့ ရှစ်နှစ်တစ်ယောက်၊ မိန်းကလေး ၁၂ နှစ်တစ်ယောက် ပြီးတော့ ကျွန်တော့်ညီရဲ့ မိန်းမ အသက် ၃ဝ အရွယ် ကျွန်တော့် ခယ်မလည်းပါသွားတယ်။

မေး - ဦးမရန်ဘောက်လာ ကရော အဲဒီနေ့က ဘယ်လိုဖြစ်လို့လွတ်သွားတာလဲ။

ဖြေ - ကျွန်တော်က ဒုက္ခသည်စခန်းကနေ ကျွန်တော်တို့အိမ်ရှိတဲ့ရွာကို ခဏပြန်ပြီး ရွာမှာကျန်ခဲ့တဲ့ စိုက်ခင်းတွေပြန်ကြည့် ပြန်ရှင်းလင်း စားဝတ်နေရေးအတွက် ငွေရှာထွက်တုန်း လွတ်သွားတုန်းမှာ ဒီလိုအဖြစ်ဆိုးကြုံရတာပါပဲ။ ကျွန်တော်ပြန်လာတော့ မိသားစုရဲ့ အလောင်းပဲတွေ့တော့တယ်။

မေး - ရုပ်အလောင်းတွေရဲ့ အခြေအနေကို ဦးမရန်ဘောက်လာ တွေ့ရသလောက် ဘယ်လောက်ဆိုးဆိုးရွားရွားဖြစ်နေလဲ ပြန်ပြောပြနိုင်လား။

ဖြေ - ကျွန်တော့်အမေရဲ့ ရုပ်အလောင်းကတော့ ခေါင်းတွေကွဲသွားပြီး လုံးဝရစရာမရှိအောင်ပါပဲ။ အသားဆိုလို့ ဘာမှမမြင်ရတော့ဘူး။ အရိုးတွေပဲကျန်တော့တယ်။ ကျွန်တော့်မိန်းမနဲ့ သားသမီးတွေကတော့ အိမ်အဆောင်ပိပြီး သေသွားတယ်။ ကျွန်တော်တို့ အဆောင်တွေဆိုလည်း အကုန်ပျက်စီးကုန်တယ်။ ဘာမှရစရာမရှိတော့ဘူး။

မေး - အဲဒီနေရာက ဒုက္ခသည်စခန်းနေရာလား၊ လူတွေဘယ်လောက်လောက်နေကြလဲ။

မေး - အဲဒီနေရာက စစ်စခန်းတွေနဲ့ တွဲနေတာမဟုတ်ဘူး။ ဒုက္ခသည်စခန်းအိမ်ခြေ ၂ဝဝ ကျော်ရှိတယ်။ ဒီနေရာ အရင်ကတည်းက ရွာအဖြစ်ရှိနေတာပါ၊ NGOs အဖွဲ့တွေက ဒုက္ခသည်စခန်းအဖြစ် နေရာချပေးထားလို့ ကျွန်တော်တို့ လာနေတာ၊ သူတို့ (စစ်ကောင်စီ)ဘက်ကတော့ ဒါကို ဘယ်လိုမြင်လဲမသိ၊ ကျွန်တော်ပြည်သူတစ်ယောက်အနေနဲ့ ကြည့်ရင်တော့ ဒီနေရာကို ဘယ်လိုမှ ပစ်စရာအကြောင်းမရှိဘူး။

မေး - ဦးမရန်ဘောက်လာတို့ မိသားစု အဲဒီစခန်းမှာနေတာ ဘယ်လောက်ကြာပြီလဲ။

ဖြေ - ၂ဝ၁၁ ခုနှစ် တိုက်ပွဲတွေဖြစ်ပြီးတော့ ကျွန်တော်တို့ မဂါ့ရန်စစ်ဘေးဒုက္ခသည်စခန်းကိုသွားနေရတယ်။ ၂ဝ၁၄ မှာ အဲဒီကတစ်ဆင့် ကျွန်တော်တို့ ဝေကျိုင်လိုင်ဇာ ဒုက္ခသည်စခန်းဘက်ပြေးလာရတယ်။ အဲဒီနေရာကတော့ လိုင်ဇာကနေဆို တစ်မိုင်လောက်ဝေးတယ်။ အဲဒီကနေတဆင့် အခု မုန်လိုင်ခက်ဒုက္ခသည်စခန်းပြောင်းလာနေတာ ခြောက်နှစ် ခုနစ်နှစ်လောက်ရှိပြီ။ မုန်လိုင်ခက်မှာ ၂ဝ၁၆ ကတည်းကနေနေတာ။

မေး - ဦးမရန်ဘောက်လာအနေနဲ့ ဒီဒုက္ခသည်စခန်းတိုက်ခိုက်မှုကို ဘယ်သူ့ လက်ချက်လို့ မြင်လဲ။

ဖြေ - ဒါကစစ်ကောင်စီလက်ချက်ပဲ၊ ကမ္ဘာ့စစ်တွေမှာသုံးတဲ့ လေယာဉ် ဗုံးအမျိုးအစားလောက်ရှိတယ်။ ဗုံးတစ်လုံးချသံပဲကြားလိုက်ရတယ်။ ဖြစ်တဲ့နေရာနဲ့ တစ်မိုင်အတွင်းမှာရှိတဲ့ လူတွေမသေရင်တောင် အိမ်တွေ အကုန်ပျက်စီးသွားတယ်။ NGOs တွေ ဆောက်ပေးတဲ့ အိမ်တွေရော၊ ဒေသခံတွေ ခက်ခက်ခဲခဲ ဆောက်ထားတဲ့အိမ်တွေရော အခုဆို သံတိုင် အုတ်မြစ်တွေပဲကျန်တယ်။ ဒီဟာက ကမ္ဘာစစ်တွေမှာသုံးတဲ့ ဗုံးအမျိုးအစားလို့ပဲ နားလည်တယ်။ မြန်မာပြည်မှာတစ်ခါမှ မသုံးဖူးတဲ့ ဗုံးအမျိုးအစား၊ တစ်ခါတည်းချလိုက်တာကို ဒီလောက် ကျင်းအနက်ကြီးဖြစ်သွားတယ်။

မေး - စစ်ကောင်စီကတော့ သူတို့လက်ချက် မဟုတ်ဘူးလို့ပြောတယ်။ ဒါနဲ့ပတ်သက်လို့ ဘာပြောချင်လဲ။

ဖြေ - စစ်ကောင်စီက ဒါပြည်သူတွေကို လိမ်တာပဲ၊ ဒါသူတို့ လာလုပ်တာ၊ လေယာဉ်က KIA လည်းမသုံးဘူး။ လေယာဉ်က စစ်ကောင်စီမှာပဲရှိတာ၊ ဒါစစ်ကောင်စီလက်ချက်ပဲ၊ KIA က လေယာဉ်နဲ့ဗုံးကြဲရအောင် လက်နက်ဒီလောက်ကြီးကြီးမားမားလည်းမရှိဘူး။ လေယာဉ်လည်းမရှိဘူး။ အချိန်ကလည်း ညသန်းခေါင်မှာဖြစ်သွားတာ၊ လာချတဲ့နေရာမှာလည်း ဘတ်ဖိုးကားကြီးတစ်ကုပ်စာလောက် နက်သွားတယ်။ စစ်ကောင်စီက ဘယ်လိုပဲလိမ်လိမ် ဒါစစ်ကောင်စီလက်ချက်ပဲဆိုတာ ကလေးကအစသိတယ်။

မေး - ဦးမရန်ဘောက်လာ က အဲဒီနေရာမှာမရှိဘဲ ဘာလို့ လေယာဉ်နဲ့ လာပစ်တာလို့ ပြောနိုင်တာလဲ။

ဖြေ - ဒီဖြစ်စဉ်နဲ့ ပတ်သက်လို့ ကျွန်တော့်မိသားစုဝင်တွေကို သွားမေးဖို့ဆိုတာ မိသားစုလည်း တစ်ယောက်မှ မရှိတော့ဘူး။ ရွာမှာကျန်ခဲ့တဲ့သူတွေ အသက်ရှင်ကျန်သူတွေပြောတာက ညကြီးအချိန်မတော် အိပ်မောကျနေတဲ့အချိန် လေယာဉ်သံကြားလိုက်တယ်။ ပြီးတော့ ဗုံးပေါက်သံအကျယ်ကြီး တစ်သံပဲကြားပြီး မြေငလျင်လှုပ်သလိုပဲဖြစ်သွားတယ်။ အဲဒီဖြစ်တော့ ဘယ်သူ ဘာဖြစ်ကြလဲဆိုတာ ဘာမှမသိတော့ဘူး။ ဗုံးကတော်တော်အင်အားပြင်းတော့ အခု အသက်မသေဘဲကျန်နေသူတွေကလည်း ရူးကြောင်ကြောင်တွေဖြစ်နေတယ်။

မေး - မိသားစုဝင်တွေအားလုံးဆုံးရှုံးလိုက်ရတဲ့သူတစ်ယောက်အနေနဲ့ ဒီကိစ္စနဲ့ပတ်သက်လို့ နိုင်ငံတကာကို ဘာပြောချင်လဲ။

ဖြေ - ကျွန်တော့်မိသားစုတွေလည်း တစ်ယောက်မှမရှိတော့ဘူး။ ကျွန်တော်တစ်ယောက်တည်း ဘဝရှေ့ဆက်ဘယ်လိုလျှောက်မလဲဆိုတာ ပြောတောင်မပြောပြတတ်တော့ဘူး။ အပြစ်တင်မယ်ဆိုရင်တော့ အပြစ်တင်လို့ဆုံးမှာမဟုတ်ဘူး။ သူ(စစ်ကောင်စီ) အုပ်ချုပ်နေတာကို အခုချက်ချင်းပြောင်းလဲစေချင်တယ်။ အခုချက်ချင်းဖြုတ်သိမ်းပေးဖို့ (နိုင်ငံတကာကို) တောင်းဆိုချင်တယ်။ ဒီစစ်ကောင်စီက ဒီတိုင်းပြည်ကို မအုပ်ချုပ်နိုင်ရင် မအုပ်ချုပ်နဲ့တော့၊  မအုပ်ချုပ်ရင် ကောင်းမယ်လို့ အဲ့ဒီလိုပဲမြင်တယ်။

မေး - ဦးမရန်ဘောက်လာ နောက်ထပ်ဘာများပြောချင်သေးလဲ။

ဖြေ - အခုလောလောဆယ် ကျွန်တော်အရမ်းခံစားနေရလို့ ခင်ဗျားကိုဖြေတာ ပြည့်စုံချင်မှပြည့်စုံလိမ့်မယ်။ ဒါပေမဲ့ ကျွန်တော်ပြောချင်တာက လက်ရှိစစ်ကောင်စီ အုပ်ချုပ်နေတာကို တစ်မိနစ် တစ်စက္ကန့်တောင်မခံချင်တော့ဘူး။ ဒါကိုအမြန်ဆုံးပြောင်းစေချင်တာပဲ သိတော့တယ်။

မုန်လိုင်ခက် ဒုက္ခသည်စခန်းကို လေကြောင်းကနေ ဗုံးကြဲတိုက်ခိုက်ခဲ့တယ်ဆိုတဲ့ ပြောဆိုချက်နဲ့ ပတ်သက်လို့ RFA က သီးခြားအတည်မပြုနိုင်သေးပါဘူး။

စစ်ကောင်စီဘက်ကတော့ ဒီတိုက်ခိုက်မှုဟာ သူတို့လက်ချက်မဟုတ်ဘူးလို့ ငြင်းဆိုထားပေမဲ့ အမေရိကန်ပြည်ထောင်စုအပါအဝင် နိုင်ငံတကာကတော့ စစ်ကောင်စီရဲ့ တိုက်ခိုက်မှုလို့ ပြောဆိုထားကြပါတယ်။ ဒီတိုက်ခိုက်မှုကြောင့် ကလေး ၁၁ ဦးအပါအဝင် ဒုက္ခသည် ၂၉ ဦး သေဆုံးခဲ့ပါတယ်။