နိုင်ငံတကာဆု ၁၁ ဆုရ Zoomers ရုပ်ရှင်ကား မိတ်ဆက်ပွဲ ချင်းမိုင်မှာပြ

မြန်မာ့နွေဦးတော်လှန်ရေး နောက်ခံဇာတ်ဖြစ်တဲ့ Zoomers (Gen Z) ရုပ်ရှင်ကားကို မိတ်ဆက်ပွဲအဖြစ် ထိုင်းနိုင်ငံမြောက်ပိုင်း ချင်းမိုင်မြို့ Outer Space မှာ သြဂုတ်လ ၂၉ ရက်ညနေက ပြသခဲ့ပါတယ်။ ဒီရုပ်ရှင်ကားကို အမေရိကန်ပြည်ထောင်စုမှာ နေထိုင်တဲ့ မြန်မာနိုင်ငံဖွား တောင်ကြီးသား ဒါရိုက်တာ Mr.Dylan Chow က ရိုက်ကူးပြီး နိုင်ငံတကာဆုပေါင်း ၁၁ ဆုထိ ရရှိထားပါတယ်။

ဒီရုပ်ရှင်ဟာ တော်လှန်ရေးထဲက လူငယ် ခုနှစ်ယောက်အကြောင်းကို ဇာတ်အိမ်တည်ပြီး ပုံဖော်ထားတာပါ။

နွေဦးတော်လှန်ရေးထဲက မြန်မာလူငယ်တွေရဲ့ဘဝနဲ့ မြန်မာပြည်မှာ ဘာတွေဖြစ်နေလဲဆိုတာတွေကို နိုင်ငံတကာက သိစေချင်လို့ ဒီကားကို ရိုက်ခဲ့တာလို့ ဒါရိုက်တာ Mr. Dylan Chow က ပြောပါတယ်။

"အဓိကရိုက်တဲ့ ရည်ရွယ်ချက်က ဗမာပြည်မှာ ဘာတွေ ဖြစ်ပျက်နေလဲ။ ကျွန်တော်တို့လူငယ်တွေ ဘာတွေ ပေးဆပ်နေလဲ။ ဘာတွေ လုပ်ဆောင်နေလဲ။ နယ်စပ်မှာပေါ့နော်။ ဒါတွေကို နိုင်ငံတကာသိဖို့ ဒီရုပ်ရှင်ကားကို ရိုက်ရခြင်းဖြစ်ပါတယ်"

Zoomers ဇာတ်ကားဟာ Dialog Film Festival မှာ Best War Film ဆု၊ Singapore Independent Film Fair မှာ Narrative Feature Winner ဆု၊ Dubai International Cine Carnival မှာ International Narrative Feature ဆုတွေအပါအဝင် ဆုပေါင်း ၁၁ ဆုထိ ရရှိထားတာဖြစ်ပါတယ်။

Zoomers ဇာတ်ကားကိုကြည့်ပြီး လက်ရှိမြေပြင်က ရဲဘော်နဲ့ ကလေးတွေရဲ့ စစ်ပွဲကြားမှာ ရှင်သန်နေရတဲ့ ဘဝတွေကို ခံစားမိသွားတယ်လို့ ရုပ်ရှင်လာကြည့်သူတစ်ဦးက ပြောပါတယ်။

“ကြည့်လိုက်ရတဲ့အချိန် ပထမဆုံးဘာခံစားရလဲဆိုတော့ ရန်ကုန်မှာ ပြေးလွှားနေခဲ့ရတဲ့ အချိန်တွေကို မျက်လုံးထဲ ပြန်သတိရသွားတယ်။ မြေပြင်မှာဖြစ်နေတဲ့ ကလေးတွေရဲ့ဘဝကို ခံစားရတယ်။ ပြီးရင် သီချင်းပေါ့။ နောက်ဆုံးမှာ သီချင်းသံကြားရတဲ့အခါမှာ ကြက်သီးတွေထပြီး တကယ့်ကို တော်လှန်ရေးထဲက ရဲဘော်တွေ ခံစားနေရတဲ့ ဘဝတွေ၊ စာသင်နေရတဲ့ ကလေးတွေ ၊ လေယာဥ်သံကြားတာနဲ့ ပြေးရတဲ့ လူငယ်တွေ၊ ကလေး ငယ်တွေရဲ့ဘဝတွေ အားလုံးကို ခံစားရတယ်”

ရုပ်ရှင်ရဲ့ နောက်ခံသီချင်းကို ‘နွေဦးမှာ ကြွေသောကြယ်’ လို့ နာမည်ပေးထားပြီး တော်လှန်ရေးသမား အနုပညာရှင် ချင်းအဆိုတော် David Lai က သီဆိုပေးထားတာပါ။

ဒီရုပ်ရှင်ကားရိုက်ဖို့ အာဏာသိမ်းအစောပိုင်းကာလက အမေရိကန်ပြည်ထောင်စုမှာရှိတဲ့ မြန်မာနိုင်ငံသားတွေရဲ့ ဆန္ဒပြပွဲတွေမှာ မှတ်တမ်းလိုက်ရိုက်ရင်း စိတ်ကူးရတာလို့ ဒါရိုက်တာ Dylan Chow က ပြောပြပါတယ်။

ဇာတ်လမ်း၊ ဇာတ်ညွှန်းကို နှစ်နှစ်ကျော် ပြင်ဆင်ခဲ့ပြီး ၂၀၂၃ ဧပြီလမှာ ထိုင်း-မြန်မာနယ်စပ်မှာ စတင်ရိုက်ကူးခဲ့တာ ဖြစ်ပါတယ်။ မင်းသား မင်းသမီးမဟုတ်တဲ့ သာမာန်ပြည်သူ လူငယ်တွေထဲကပဲ သရုပ်ဆောင်အဖြစ်ရွေးချယ်ပြီး ဇာတ်ရုပ်ပီပြင်ဖို့အတွက် အွန်လိုင်းကနေ သုံးလနီးပါး သင်တန်းပေးခဲ့ရတယ်လို့လည်း သူက ပြောပါတယ်။

ဆက်နွှယ်သောသတင်းများ

ရုပ်ရှင်ပွဲတော်ဂုဏ်ထူးဆောင်ဆု ရပေမဲ့ ဒါရိုက်တာ ဏကြီးတို့ ဇနီးမောင်နှံမပျော်နိုင်

ပန်းချီဆွဲ တက်တူးထိုးပြီး တော်လှန်ရေးကို ထောက်ပံ့ကူညီနေသူ စောစေးဝါး

ရှေ့တန်းက လူငယ်တွေအကြောင်း ပန်းချီရေး မှတ်တမ်းတင်နေသူ

တော်လှန်ရေးထဲက တကယ့်အဖြစ်အပျက်တွေကို အခြေခံရိုက်ကူးထားတာမို့ ပါဝင်သရုပ်ဆောင်ဖြစ်ခဲ့တာလို့ ဇာတ်ကားမှာ သရုပ်ဆောင်အဖြစ်ပါဝင်တဲ့ မဇင်ဇင်က ပြောပြပါတယ်။

“ဒီဇာတ်လမ်းကို ပါဝင်ဖြစ်ခဲ့တဲ့အကြောင်းကတော့ သူငယ်ချင်း သရုပ်ဆောင် ရပ်ဆဲလ်ကနေ Script လာပြတဲ့ အချိန်မှာ တော်လှန်ရေးကာလတစ်လျှောက်မှာ ကျွန်မတို့ တကယ်ဖြတ်သန်းလာခဲ့ရတဲ့ True Story ကို အခြေခံ ထားတာဖြစ်တယ်။ သရုပ်ဆောင်အစစ်မဟုတ်တဲ့အတွက် ဖြတ်သန်းလာရတဲ့ အခြေအနေပေါ်မှာ မူတည်ပြီး အခက်ခဲတွေကြားကနေ အကောင်းဆုံးသရုပ်ဆောင်ခဲ့ကြတာပါ။ ကိုဝဏ္ဏမျိုးသိမ်းကလည်း Acting Coach အနေနဲ့ ဟိုဘက်ကနေ Zoom နဲ့ ကူညီပံ့ပိုးပေးပါတယ်။ ဒီကားထဲမှာ အောင်မြင်နေတဲ့ Designer ကောင်မလေးက သူ့ချစ်သူကောင်လေး မျက်စိရှေ့မှာ သေနတ်နဲ့ အပစ်ခံရပြီး သေဆုံးသွားတဲ့အချိန်မှာ တောထဲကို လက်နက်ကိုင်အနေနဲ့ ဝင်ရောက်ခဲ့တဲ့ "နှောင်း" ကာရိုက်တာနဲ့ ပါဝင်ထားပါတယ်”

ဒီဇာတ်ကားကို မလေးရှား၊ နယူးဇီလန်၊ အမေရိကန်ပြည်ထောင်စု၊ တောင်ကိုရီးယား၊ ထိုင်ဝမ် နိုင်ငံတွေမှာ ပြသပြီးခဲ့ပြီး ရရှိတဲ့အကျိုးအမြတ်ထဲကနေ မြန်မာနိုင်ငံထဲကို ပေးပို့ကူညီနိုင်ခဲ့တယ်လို့ ဒါရိုက်တာ Dylan Chow က ပြောပါတယ်။

အခု ထိုင်းနိုင်ငံ၊ ချင်းမိုင်မြို့မှာတော့ မိတ်ဆက် Private Show အနေနဲ့ အရင်ပြသတာဖြစ်ပြီး လာမယ့် ဒီဇင်ဘာမှာ ပွဲတစ်ခုအနေနဲ့ ကျင်းပပြသသွားမှာ ဖြစ်ပါတယ်။

ဒီရုပ်ရှင်ကားကတဆင့် မြန်မာ့အရေးကို နိုင်ငံတကာက တစ်စိတ်တစ်ပိုင်းပဲဖြစ်စေ သိအောင်လုပ်နိုင်ပေးခဲ့လို့ ကျေနပ်ရတယ်လို့ ဒါရိုက်တာ Dylan Chow က ပြောပါတယ်။