မြန်မာနိုင်ငံ ငြိမ်းချမ်းရေး၊ သဟဇာတဖြစ်ရေးနဲ့ စီးပွားရေးအတွက် ကမ္ဘာ့ဘဏ် ဆက်လက်ကူညီမည်

မြန်မာနိုင်ငံက ငြိမ်းချမ်းရေး၊ လူမှုအသိုင်းအဝိုင်းတွေကြား သဟဇာတဖြစ်ရေးနဲ့၊ စီပွားရေးပြုပြင် ပြောင်းလဲရေးတို့အတွက် ဆက်လက်ကူညီမယ်လို့ ကမ္ဘာ့ဘဏ်က ဒီနေ့ပြောလိုက်ပါတယ်။

အရှေ့အာရှနဲ့ ပစိဖိတ်ရေးရာ ကမ္ဘာ့ဘဏ် ဒုတိယဥက္ကဋ္ဌ ဗစ်တိုးရီးယားကွာကွာ (Ms. Victoria Kwakwa) ရဲ့ သုံးရက်ကြာ မြန်မာနိုင်ငံခရီးစဉ်အပြီး ထုတ်ပြန်တဲ့ ကြေညာချက်မှာ အဲဒီလို ဖော်ပြလိုက်တာပါ။

ခရီးစဉ်အတွင်း Ms. Kwakwa ဟာ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ အစိုးရ တာဝန်ရှိသူတွေ၊ သံတမန်တွေနဲ့ ဖွံ့ဖြိုးရေးမိတ်ဖက် အဖွဲ့အစည်းတွေနဲ့ တွေ့ဆုံခဲ့ပါတယ်။

အဲဒီလိုတွေ့ဆုံစဉ်မှာ မြန်မာနိုင်ငံက လူမှု အသိုင်းအဝန်းအားလုံး သဟဇာတရှိရှိ နေနိုင်ရေးနဲ့  ဖွံ့ဖြိုးတိုးတက်ရေးအတွက် ငြိမ်းချမ်းရေးက အဓိက ကျတာကို ဆွေးနွေးခဲ့ကြတယ်လို့ ကြေညာချက်မှာ ဖော်ပြပါတယ်။

ဒါကြောင့် ကမ္ဘာ့ဘဏ်က မြန်မာနိုင်ငံကိုပေးတဲ့ ဘဏ္ဍာရေးနဲ့ နည်းပညာ အကူအညီတွေဟာ ဒီအချက်ပေါ် အခြေခံမယ်လို့ ပြောပါတယ်။

ဒါ့အပြင် ရပ်ရွာအသိုင်းအဝိုင်းတွေရဲ့ စွမ်းဆောင်ရည် မြင့်မားရေးအတွက် ရည်ရွယ်တဲ့၊ ငြိမ်းချမ်းပြီး စည်ပင်ဖွံ့ဖြိုးတဲ့ အသိုင်းအဝိုင်း ထူထောင်ရေး  အစီအစဉ်အတွက် ကနဦး ပထမအဆင့်အဖြစ် အမေရိကန်ဒေါ်လာ သန်း ၂ဝဝ ကနေ ၂၅ဝ အထိ ကူညီဖို့ လျာထားတယ်လို့လည်း ဆိုပါတယ်။

ရခိုင်ပြည်နယ် ပြန်လည်ထူထောင်ရေးနဲ့ ဖွံ့ဖြိုးရေးအစီအစဉ်အတွက် အမေရိကန်ဒေါ်လာ သန်းတရာ ကူညီပံ့ပိုးမယ်လို့လည်း  Ms. Victoria Kwakwa  က ပြောပါတယ်။