ပညာရေးဥပဒေပြင်ဆင်မှု မူကြမ်း အမျိုးသားလွှတ်တော် မှာ ဆွေးနွေး

အမျိုးသားပညာရေးဥပဒေကို ပြင်ဆင်တဲ့ဥပဒေမူကြမ်း ကို အမျိုးသားလွှတ်တော်မှာ ဒီကနေ့ စတင်ဆွေးနွေးခဲ့ ပါတယ်။

ကမ္ဘာ့အဆင့်မီတဲ့ ပညာရေးစနစ်ဖြစ်ဖို့အတွက် အင်္ဂလိပ် ဘာသာစကားကို အခြေခံပညာအဆင့်ကစပြီး အဓိက ဘာသာရပ်အဖြစ် သင်ကြားရေးကို ဥပဒေမူကြမ်းမှာ ထည့်သွင်းပေးဖို့ ချင်းပြည်နယ် အမျိုးသားလွှတ်တော် ကိုယ်စားလှယ် ဦးပေါ်လျှံလွင်က ဆွေးနွေးခဲ့ပါတယ်။

ဒီနေ့ဆွေးနွေးခဲ့တဲ့ လွှတ်တော်ကိုယ်စားလှယ် ၈ ဦးက စိုက်ပျိုးရေး၊ မွေးမြူရေးပညာရပ်တွေကို လက်တွေ့ကျကျ သင်ကြားနိုင်ရေး၊ တိုင်းရင်းသားဘာသာစကား သင်ကြားရေးနဲ့ စာပေယဉ်ကျေးမှု ဖွံ့ဖြိုးတိုးတက်ရေး စတဲ့အချက်တွေကို ဥပဒေမူကြမ်းမှာထည့်သွင်း ဖို့ ဆွေးနွေးခဲ့ကြပါတယ်။

အဲဒီဥပဒေမူကြမ်းကို သပိတ်မှောက်ကျောင်းသားကိုယ်စားလှယ်တွေ၊ ပညာရေးစနစ် ပြုပြင်ပြောင်းလဲရေး နိုင်ငံလုံး ဆိုင်ရာကွန်ရက် NNER၊ နိုင်ငံရေးပါတီတွေ၊ ကျောင်းသားသပိတ်ကို ထောက်ခံသူတွေ၊ အရပ်ဘက်လူမှုအဖွဲ့ အစည်းတွေနဲ့ ကြားနာပွဲတွေကျင်းပပြီး တင်သွင်းခဲ့တာဖြစ်ပါတယ်။

အဲဒီဥပဒေမူကြမ်းကို တပ်မတော်သား လွှတ်တော်ကိုယ်စားလှယ် ၂ ဦးအပါအဝင် ကိုယ်စားလှယ် ၇ ဦးက မနက်ဖြန်ကျင်းပမယ့် အမျိုးသားလွှတ်တော်မှာ ဆက်လက်ဆွေးနွေးမှာဖြစ်ပါတယ်။

ဒီအကြောင်း RFA သတင်းထောက် မပြုံးမို့မို့ဇင် က တင်ပြထားပါတယ်။