မုန်းမြို့မှာ လက်နက်ကြီးကြောင့် ဒေသခံ သုံးဦး ဒဏ်ရာရ

ပဲခူးတိုင်း၊ ကျောက်ကြီးမြို့နယ်၊ မုန်းမြို့ ကော့ပြင်းရွာ၊ သာပြာအိုင်ရွာနဲ့ သစ်ဖြူဆိတ် ရွာတွေမှာ စက်တင်ဘာလ ၁ ရက် နဲ့ ၂ ရက်နေ့တွေအတွင်း လက်နက်ကြီးကျည် ကျရောက်ပေါက်ကွဲခဲ့ပြီး အရပ်သား သုံးဦး ဒဏ်ရာရရှိခဲ့တယ်လို့ ဒေသခံတွေက ပြောပါတယ်။

မုန်းမြို့ အောင်ဇေယျရပ်ကွက်မှာရှိတဲ့ စစ်ကောင်စီတပ် ခမရ (၃၀၇) က စက်တင်ဘာလ ၂ ရက် မနက်မှာ ၁၂၂ မမ လက်နက်ကြီးတွေပစ်ခတ်ခဲ့လို့ သစ်ဖြူဆိတ်ရွာက အသက် ၂၂ နှစ်အရွယ် မအိသဇင် ဒဏ်ရာရရှိခဲ့ပါတယ်။

အဲဒီနေ့မှာပဲ စစ်ကောင်စီတပ် ခမရ (၅၉၀) က လက်နက်ကြီးနှစ်လုံး ပစ်ခတ်ခဲ့လို့ သာပြာအိုင်ရွာက အသက် ၃၄ နှစ်အရွယ် ကိုမျိုးအောင် ဒဏ်ရာရရှိခဲ့ပါတယ်။

ခမရ (၅၉၀) ဟာ စက်တင်ဘာလ ၁ ရက် ညနေ ၅ နာရီဝန်းကျင်ကလည်း လက်နက်ကြီးကျည်နှစ်လုံး ပစ်ခတ်ခဲ့တာကြောင့် ကော့ပြင်းရွာ အသက် ၂၄ နှစ်အရွယ် ကိုဖြိုး ဒဏ်ရာရရှိခဲ့ပါတယ်။

အရပ်သားသေဆုံးထိခိုက်မှုတွေနဲ့ပတ်သက်လို့ စစ်ကောင်စီရဲ့ ပဲခူးတိုင်းပြောခွင့်ရသူ တိုင်းစီးပွားရေးရာဝန်ကြီး ဦးတင်ဦးကို RFA က တယ်လီဖုန်းနဲ့ဆက်သွယ်ခဲ့ပေမယ့် လက်ခံဖြေဆိုတာမရှိပါဘူး။

RFA က ပြုစုထားတဲ့စာရင်းတွေအရ ၂၀၂၃ ခုနှစ် သြဂုတ်လတုန်းကလည်း ပဲခူးတိုင်း၊ ညောင်လေးပင်ခရိုင်အတွင်း လက်နက်ကြီးနဲ့ လေကြောင်းတိုက်ခိုက်မှုကြောင့် အရပ်သား ၁၂ ဦး သေဆုံးပြီး ၃၅ ဦး ဒဏ်ရာရရှိခဲ့ပါတယ်။