ဒေါ်အောင်ဆန်းစုကြည်ကို ကနေဒါဝန်ကြီးချုပ် ဖိတ်ကြား

ဒေါ်အောင်ဆန်းစုကြည်အနေနဲ့ လောလောဆယ် မြန်မာနိုင်ငံတွင်းမှာ လုပ်ငန်း တာဝန်တွေကို အာရုံစိုက် လုပ်ဆောင်နေရတဲ့ အတွက် သင့်လျော်တဲ့ အချိန် တချိန်မှာ ကနေဒါ နိုင်ငံကို လာရောက်မယ်လို့ မျှော်လင့်ကြောင်း ကနေဒါ ဝန်ကြီးချုပ်က ပြောပါတယ်။ ဆုကို ကိုယ်တိုင် လက်ခံယူဖို့ အတွက် ဒေါ်အောင်ဆန်းစုကြည်ကို တရားဝင် ဖိတ်ကြားစာ ပေးပို့ရာမှာ ကနေဒါနိုင်ငံဟာ ဒေါ်အောင်ဆန်းစုကြည် အပါအဝင် မြန်မာ့ ဒီမိုကရေစီရေး အတွက် နှစ်ပေါင်းများစွာ ကြိုးပမ်း နေကြသူတွေနဲ့ အတူတကွ ရပ်တည်နေတယ် ဆိုတာကို ဂုဏ်ယူ ပြောကြားပါကြောင်း ရေးသား ထားပါတယ်။

ဒါ့ပြင် ဒေါ်အောင်ဆန်းစုကြည် အပါအဝင် ဒီမိုကရက်တစ် အင်အားစုတွေ၊ တိုင်းရင်းသား ခေါင်းဆောင်တွေနဲ့ တွေ့ဆုံ ဆွေးနွေးဖို့လည်း မြန်မာ စစ်အစိုးရကို တောင်းဆို လိုက်ပါတယ်။

ဒေါ်အောင်ဆန်းစုကြည်ကို ဂုဏ်ထူးဆောင် ကနေဒါ နိုင်ငံသားအဖြစ် ၂၀၀၇ ခုနှစ်မှာ ကနေဒါ လွှတ်တော်က ချီးမြင့်ခဲ့တာ ဖြစ်ပါတယ်။

ဒေါ်အောင်ဆန်းစုကြည် အပါအဝင် ဒီဂုဏ်ထူးဆောင်ဆု ချီးမြင့်ခံရတဲ့ နိုင်ငံတကာက ထင်ရှားတဲ့ ပုဂ္ဂိုလ် ငါးဦးသာ ရှိပြီး ကျန်တဲ့ လေးဦးကတော့ ဒုတိယ ကမ္ဘာစစ် အတွင်း ဂျူးလူမျိုး ထောင်ပေါင်း များစွာကို ကယ်တင်ခဲ့တဲ့ ဆွီဒင်နိုင်ငံက Raoul Wallenberg ၊ တောင်အာဖရိက သမ္မတဟောင်း နယ်လ်ဆင် မင်ဒဲလား၊ တိဗက် ဘုန်းတော်ကြီး ဒလိုင်း လားမား နဲ့ ကမ္ဘာ့ အစ္စလာမ္မစ် မွတ်ဆလင် ခေါင်းဆောင် Aga Khan တို့ ဖြစ်ပါတယ်။

ဒီဆုကို ကိုယ်တိုင် လာရောက်လက်ခံယူဖို့ကိုလည်း ကနေဒါ New Democratic Party (NDP) ခေါင်းဆောင် Mr. jack Layton က ဒီဇင်ဘာလ အစောပိုင်းက ဖိတ်ကြားခဲ့ပါတယ်။