မုန်တိုင်းသင့် ချင်းပြည်သူတွေကို KIO ကျပ်သိန်းနှစ်ထောင်ကူညီ

မုန်တိုင်းဒဏ်ခံခဲ့ရတဲ့ ချင်းပြည်သူတွေအတွက် ကချင်လွတ်မြောက်ရေးအဖွဲ့ KIO က ငွေကျပ် သိန်းနှစ်ထောင်ကို ချင်းအမျိုးသားတပ်ဦးက တစ်ဆင့်ကူညီထောက်ပံ့လိုက်တယ်လို့ ဇွန်လ ၅ ရက်နေ့မှာ ကြေညာချက် ထုတ်ပြန်ပါတယ်။

ချင်းပြည်နယ်က မုန်တိုင်းသင့်ပြည်သူတွေပြန်လည်ထူထောင်ရေးအတွက် အခုလိုထောက်ပံ့ကူညီတဲ့ KIO ကိုကျေးဇူးတင်တယ်လို့ ချင်းအမျိုးသားတပ်ဦးရဲ့ အထွေထွေအတွင်းရေးမှူးက ပြောပါတယ်။

မိုခါဆိုင်ကလုန်းမုန်တိုင်းကြောင့် ချင်းပြည်နယ်က မြို့နယ် ၉ မြို့နယ်လုံးမှာ နေအိမ်တွေ၊ ဘာသာရေးနဲ့ ကျန်းမာရေးအဆောက်အဦတွေ ပျက်စီးဆုံးရှုံးခဲ့ပြီး လမ်းတွေပျက်လို့ လမ်းပန်းဆက်သွယ်ရေး အခက်အခဲတွေလည်းရှိနေတယ်လို့ ချင်းအမျိုးသားတပ်ဦးရဲ့ ပြောရေးဆိုခွင့်ရှိသူ ဆလိုင်းထက်နီ က RFA ကိုပြောထားပါတယ်။

ထိခိုက်ဆုံးရှုံးမှုတွေများခဲ့တဲ့ ရခိုင်ပြည်နယ်အတွက်လည်း အမျိုးသားညီညွတ်ရေးအစိုးရ NUG အပါအဝင် တိုင်းရင်းသားလက်နက်ကိုင်အဖွဲ့အစည်းတွေက ထောက်ပံ့ကူညီမှုတွေရှိနေပါတယ်။

အမျိုးသားဒီမိုကရေစီမဟာမိတ်အဖွဲ့ NDAA က ကျပ်သိန်းနှစ်ထောင်၊ ရှမ်းပြည်တိုးတက်ရေးပါတီ SSPP က ကျပ်သိန်းတစ်ထောင်၊ တအာင်းအမျိုးသားလွတ်မြောက်ရေးတပ်မတော် TNLA က ကျပ်သိန်းငါးရာ၊ မွန်ပြည်သစ်ပါတီ NMSP က ကျပ်သိန်းငါးရာနဲ့ အမျိုးသားညီညွတ်ရေးအစိုးရ NUG က ကျပ်သိန်းတစ်ထောင်၊ စုစုပေါင်း ကျပ်သိန်းငါးထောင်ကို ရက္ခိုင့်တပ်တော် AA ကတစ်ဆင့် ထောက်ပံ့ကူညီထားကြောင်း AA က ကြေညာချက်တွေ အသီးသီးထုတ်ပြန်ထားပါတယ်။

ပြီးခဲ့တဲ့ မေလ ၁၄ ရက်နေ့က မြန်မာနိုင်ငံကို ဝင်ရောက်တိုက်ခိုက်ခဲ့တဲ့ မိုခါမုန်တိုင်းကြောင့် ရခိုင်ပြည်နယ်၊ ချင်းပြည်နယ်၊ မကွေးတိုင်း၊ စစ်ကိုင်းတိုင်းနဲ့ ကချင်ပြည်နယ်တွေမှာ မုန်တိုင်းသင့်လူဦးရေ ၁.၆ သန်းရှိခဲ့ပြီး သူတို့ကို ကူညီဖို့အတွက် အရေးပေါ်ရန်ပုံငွေ အမေရိကန် ဒေါ်လာ ၃၃၃ သန်းထည့်ဝင်ပေးဖို့လည်း ကုလသမဂ္ဂက နိုင်ငံတကာကို တိုက်တွန်းထားပါတယ်။