မတူပီမြို့မှာ ဆန်ပြတ်လပ်ပြီး ဒေသခံတွေ အခက်အခဲဖြစ်နေ

RFA Burmese
2023.01.24
Share on WhatsApp
Share on WhatsApp
မတူပီမြို့မှာ ဆန်ပြတ်လပ်ပြီး ဒေသခံတွေ အခက်အခဲဖြစ်နေ ချင်းပြည်နယ်၊ ပလက်ဝမြို့နယ် မြိတ်ဝကျေးရွာမှ စစ်ဘေးဒုက္ခသည်များအား ၂၀၂၂ ခုနှစ်၊ စက်တင်ဘာလ ၂ ရက်နေ့က တွေ့ရစဉ်။
Khine Murn Chun

ချင်းပြည်နယ်၊ မတူပီမြို့နယ်မှာ စစ်ကောင်စီတပ်က ဆန်ဝယ်ယူစုဆောင်းနေတာကြောင့် ဇန်နဝါရီလ ၉ ရက်နေ့ကစပြီး ဒေသခံတွေ ဆန်ဝယ်လို့မရတော့ဘဲ စားသောက်ရေး အခက်အခဲဖြစ်နေတယ်လို့ ဒေသခံတွေက ပြောပါတယ်။

ဈေးဆိုင်တွေမှာ ဆန်တစ်အိတ်ကို ငွေကျပ်တစ်သိန်းအထိ ပေးဝယ်တာတောင် ရောင်းမယ့်သူမရှိတော့ဘူးလို့ လုံခြုံရေးအရ အမည်မဖော်လိုတဲ့ မတူပီမြို့ခံတစ်ဦးက RFA ကို ပြောပါတယ်။

"ဟုတ်ပါတယ်။ တစ်မြို့လုံး ဆန်ကိုမရှိတော့တာ။ မင်းတပ်-မတူပီ လမ်းကလည်း ပိတ်ထားတော့ ပိုခက်ခဲတာပေါ့။ အရင်ကတော့ တောင်ယာဆန်တွေ စိုက်ပျိုး စားသောက်ကြပေမယ့် စစ်ပြေးနေရတော့ မစိုက်နိုင်တော့ဘဲ ဝယ်စားနေရတာ"

မတူပီမှာ စစ်ကောင်စီတပ်နဲ့ မတူပီကာကွယ်ရေးတပ် (CDF-Matupi) အကြား မကြာခဏတိုက်ပွဲဖြစ်နေသလို ဖုန်းလိုင်းနဲ့ အင်တာနက်လိုင်းတွေလည်း ဖြတ်တောက်ခံထားရတယ်လို့ သူကဆိုပါတယ်။

ဆန်ပြတ်လပ်တာဟာ စစ်ကောင်စီတပ်က ဝယ်ယူစုဆောင်းနေတာကြောင့်လို့ ဒေသခံတွေကပြောပေမယ့် RFA အနေနဲ့ သီးခြားအတည်မပြုနိုင်ပါဘူး။

ဒီကိစ္စနဲ့ပတ်သက်ပြီး စစ်ကောင်စီရဲ့ ချင်းပြည်နယ်ပြောခွင့်ရသူ ပြည်နယ်လူမှုရေးဝန်ကြီး ဦးသန့်ဇင်ကို RFA က တယ်လီဖုန်းနဲ့ ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။

ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UN OCHA) ရဲ့ စာရင်းအရ စစ်တပ်အာဏာသိမ်းပြီးချိန်ကနေ ၂၀၂၂ ခုနှစ်၊ ဒီဇင်ဘာလကုန်အထိ မလုံခြုံမှုနဲ့ ပဋိပက္ခတွေကြောင့် ချင်းပြည်နယ်မှာ စစ်ဘေးဒုက္ခသည် ငါးသောင်းနီးပါး ရှိပါတယ်။

မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။