ချင်းတွင်းမြစ်ထဲ စစ်သင်္ဘောတိမ်းမှောက်၊ လူတစ်ရာကျော်ပျောက်ဆုံးနေ

စစ်ကိုင်းတိုင်း မင်းကင်းမြို့နယ် ရှဲနတ်တောင်နား ချင်းတွင်းမြစ်ထဲမှာ စစ်သင်္ဘောတစ်စီးတိမ်းမှောက်ပြီး လူတစ်ရာကျော် ပျောက်ဆုံးနေတယ်လို့ ဒေသခံတွေက RFA ကို ပြောပါတယ်။

ဟုမ္မလင်းမြို့ကနေထွက်လာတဲ့ အဲဒီသင်္ဘောဟာ ပျူစောထီးရွာလို့ လူသိများတဲ့ မင်းကင်းမြို့ ပန်းဆက်ရွာမှာရပ်ပြီး ရိက္ခာနဲ့ လက်နက်တွေတင်ဆောင်ခဲ့သလို ကျောင်းသားတွေ၊ ဆရာ၊ ဆရာမတွေကိုပါ တင်ဆောင်လာတာလို့ မျက်မြင်တွေ့သူတွေက ဆိုပါတယ်။

အဲဒီသင်္ဘောဟာ ရှဲနတ်တောင်အငူကိုဝင်တိုက်ပြီး တစ်စီးလုံး နှစ်မြုပ်သွားတာပါ။ လိုက်လာတဲ့သူတွေထဲက နှစ်ဦးပဲ လွတ်မြောက်ပြီး ကျန်တဲ့သူတွေ အားလုံးကတော့ ပျောက်ဆုံးနေဆဲပဲလို့ ဒေသခံက ပြောပါတယ်။

“ပျူစောထီးမိသားစုဝင်တွေထဲက ကျောင်းသွားတက်မဲ့ ကျောင်းသား၊ ကျောင်းသူတွေပါတယ်။ သမ္ဗန်အသေးတွေနဲ့ သူတို့ကယ်ဆယ်ရေးလုပ်နေတယ်။ လွတ်လာတာ နှစ်ယောက်ပဲဆိုတော့ ကျန်တာတော့ အသေလို့ပဲ တွက်လို့ရမှာပေါ့။ အလောင်းကတော့ ခြောက်လောင်း ခုနစ်လောင်းလောက်ပဲ ရသေးတယ်”

သင်္ဘောပေါ်မှာ စစ်ကောင်စီ ညွှန်မှူးတစ်ဦး၊ စစ်ကောင်စီ တပ်သား ငါးဦးနဲ့ ဗျူစောထီးအဖွဲ့ဝင်တွေလည်းပါသလို ကျောက်စိမ်းတွေလည်း သယ်ဆောင်လာတယ်လို့ ဆိုပါတယ်။

သင်္ဘောပေါ်ပါလာတဲ့သူတွေနဲ့ ပတ်သက်လို့ RFA က သီခြားအတည်မပြုနိုင်သေးပါဘူး။ စစ်ကောင်စီဘက်ကလည်း သတင်းထုတ်ပြန်တာမရှိသေးပါဘူး။