မြန်မာနဲ့ ဘင်္ဂလားဒေ့ရှ်က ဒုက္ခသည်တွေကို ယူရို ၁၀ သန်းခွဲ EU ထပ်တိုးကူညီ

မြန်မာနဲ့ ဘင်္ဂလားဒေ့ရှ်က ရိုဟင်ဂျာဒုက္ခသည်တွေအတွက် လူသားချင်းစာနာထောက်ထားမှုအကူအညီ ယူရို ၁၀ သန်းခွဲ (အမေရိကန်ဒေါ်လာ ၁၁ သန်းခွဲနီးပါး) ထပ်မံထောက်ပံ့သွားမယ်လို့ ဥရောပသမဂ္ဂ (EU) က နိုဝင်ဘာ ၁၆ ရက်နေ့မှာ သတင်းထုတ်ပြန်ပါတယ်။

မြန်မာနိုင်ငံက အကူအညီလိုအပ်နေသူတွေကို ယူရို ခုနစ်သန်း ထောက်ပံ့ပေးမှာဖြစ်ပြီး ဘင်္ဂလားဒေ့ရှ်က ရိုဟင်ဂျာဒုက္ခသည်တွေအတွက် ယူရို သုံးသန်းခွဲ ထောက်ပံ့သွားမယ်လို့ ဆိုပါတယ်။

EU ရဲ့ အကျပ်အတည်း စီမံခန့်ခွဲရေးမဟာမင်းကြီး Janez Lenarčič က မြန်မာနိုင်ငံမှာ ပဋိပက္ခတွေ လျော့နည်းမသွားတာကြောင့် အကူအညီတွေထပ်ပေးသွားမှာဖြစ်ပြီး လူသားချင်းစာနာထောက်ထားမှု အကူအညီပေးနေသူတွေ ဘေးကင်းလုံခြုံရေးမှုရှိရှိ သွားလာခွင့်ရဖို့ အရေးကြီးတယ်လို့ ထုတ်ပြန်ချက်မှာ တိုက်တွန်းထားပါတယ်။

မြန်မာနိုင်ငံမှာ ဆက်လက်ဖြစ်ပွားနေတဲ့ ပဋိပက္ခတွေကြောင့် စားနပ်ရိက္ခာ အရေးတကြီးလိုအပ်နေပြီး အခုပေးမယ့်အကူအညီတွေထဲမှာ စားနပ်ရိက္ခာနဲ့ အာဟာရထောက်ပံ့တာတွေအပါအဝင် အရေးပေါ်လိုအပ်တဲ့အကူအညီတွေ ပေးသွားမှာဖြစ်ပါတယ်။

ဒါ့အပြင် ကျန်းမာရေးစောင့်ရှောက်မှုနဲ့ မရှိမဖြစ်လိုအပ်တဲ့ ရေနဲ့ သန့်ရှင်းရေးသုံးပစ္စည်းတွေ ကူညီပေးနေတဲ့ အဖွဲ့အစည်းတွေကိုလည်း ကူညီထောက်ပံ့ပေးသွားမယ်လို့ EU က ပြောပါတယ်။

အလားတူ ဘင်္ဂလားဒေ့ရှ်ကိုရောက်နေတဲ့ ရိုဟင်ဂျာဒုက္ခသည်တွေကိုလည်း ယူရို သုံးသန်းခွဲထဲကနေ အစားအစာနဲ့ အာဟာရဆိုင်ရာ အကူအညီတွေ ဆက်လက်ထောက်ပံ့သွားမှာဖြစ်ပြီး ကျန်းမာရေးနဲ့ ပညာရေးဆိုင်ရာ ကိစ္စတွေကိုလည်း ပံ့ပိုးသွားမယ်လို့ ဆိုပါတယ်။

အခုထပ်တိုးပေးလိုက်တဲ့ ယူရို ၁၀ သန်းခွဲနဲ့ဆိုရင် EU က မြန်မာနိုင်ငံမှာရှိနေတဲ့ ဒုက္ခသည်တွေအပါအဝင် ရိုဟင်ဂျာဒုက္ခသည်တွေအတွက် ၂၀၂၃ ခုနှစ်အတွင်း စုစုပေါင်း ယူရို ၆၈ သန်း ကူညီထောက်ပံ့ခဲ့တယ်လို့ ပြောပါတယ်။