နိုင်ငံတစ်ဝန်း ရေဘေးကြောင့် ၇၄ ဦး သေဆုံးကြောင်း စစ်ကောင်စီပြော

နိုင်ငံတစ်ဝန်းက မြို့နယ်ပေါင်း ၆၄ မြို့နယ်မှာ ရေကြီးရေလျှံမှုတွေဖြစ်ခဲ့ပြီး စက်တင်ဘာလ ၁၃ ရက်နေ့ ညပိုင်းအထိ ရထားတဲ့စာရင်းတွေအရ သေဆုံးသူ ၇၄ ဦးအထိရှိပြီး ပျောက်ဆုံးနေသူက ၈၉ ဦးရှိတယ်လို့ စစ်ကောင်စီ ပြန်ကြားရေးဝန်ကြီးဌာနက စက်တင်ဘာလ ၁၄ ရက်နေ့မှာ ဖော်ပြပါတယ်။

နေပြည်တော်ကောင်စီနယ်မြေ၊ မန္တလေးတိုင်း၊ ပဲခူးတိုင်း၊ ရှမ်းပြည်နယ်၊ မွန်ပြည်နယ်၊ ဧရာ၀တီတိုင်းတို့က ရပ်ကွက်နဲ့ ကျေးရွာပေါင်း ငါးရာနီးပါး (၄၆၂ ရွာ) မှာ ရေကြီးရေလျှံမှုတွေ ဖြစ်ခဲ့ပြီး လူနေအိမ်ပေါင်း ခြောက်သောင်းခွဲကျော် (၆၅,၇၅၉ လုံး) ရေနစ်မြုပ်ခဲ့တယ်လို့ ဆိုပါတယ်။

ဒီအပြင် တံတား ၂၄ စင်း၊ ဆည်/တမံ ငါးခု၊ ဘုန်းကြီးကျောင်းတစ်ကျောင်း၊ ဘုရားစေတီ လေးဆူ၊ ထရန်စဖော်မာ ၁၄ လုံးနဲ့ ဓာတ်မီးတိုင် ငါးရာနီးပါး (၄၅၆ တိုင်) ထိခိုက်ပျက်စီးတယ်လို့လည်း ဆိုပါတယ်။ စာသင်ကျောင်းပေါင်း ၃၇၅ ကျောင်းလည်း ရေဝင်နစ်မြုပ်ပြီး ထိခိုက်ပျက်စီးမှုတွေ ရှိခဲ့တယ်လို့ စစ်ကောင်စီက ဖော်ပြပါတယ်။

ရေကြီးမှုကြောင့် မြို့နယ်ပေါင်း ၃၄ မြို့နယ်က လူဦးရေ နှစ်သိန်းလေးသောင်းနီးပါး (၂၃၆,၆၄၉) ကို ကူညီကယ်ဆယ်ရေးစခန်းတွေကို ရွှေ့ပြောင်းပေးထားရကြောင်း စက်တင်ဘာလ ၁၂ ရက်နေ့ ညနေပိုင်းက စစ်ကောင်စီက ထုတ်ပြန်ထားပြီး ဒီရက်ပိုင်း ထပ်တိုးလာတဲ့ ရေဘေးသင့်သူ အရေအတွက်ကိုတော့ ထုတ်ပြောလာတာ မရှိသေးပါဘူး။

လက်ရှိမှာတော့ ဒုဌ၀တီမြစ်၊ စစ်တောင်းမြစ်၊ ပဲခူးမြစ်နဲ့ သံလွင်မြစ်ရေတွေဟာ မြို့တချို့မှာ စိုးရိမ်ရေမှတ်ကို ကျော်လွန်နေပြီး ရေကြီးရေလျှံမှုတွေဖြစ်နေတယ်လို့ စစ်ကောင်စီရဲ့ မိုးလေဝသနဲ့ ဇလဗေဒ ဦးစီးဌာနက စက်တင်ဘာလ ၁၅ ရက်နေ့ မနက်မှာ ထုတ်ပြန်ထားပါတယ်။