KNU ထိန်းချုပ်နယ်မြေမှာ ဒီဇင်ဘာလအတွင်း ဒေသခံ လေးဦးသေ၊ ၂၇ ဦးဒဏ်ရာရ

ကရင်အမျိုးသားအစည်းအရုံး (KNU) ထိန်းချုပ်နယ်မြေမှာ ၂၀၂၂ ခုနှစ် ဒီဇင်ဘာလအတွင်း တိုက်ပွဲကြောင့် ဒေသခံ လေးဦးသေဆုံးပြီး ၂၇ ဦးဒဏ်ရာရရှိခဲ့တယ်လို့ KNU ဗဟိုက ၂၀၂၃ ခုနှစ် ဇန်နဝါရီလ ၇ ရက် ဒီကနေ့ သတင်းထုတ်ပြန်ပါတယ်။

စစ်ကောင်စီတပ်နဲ့ KNU လက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA)၊ ပြည်သူ့ကာကွယ်ရေးတပ် (PDF) ပူးပေါင်းတပ်တွေအကြား တိုက်ပွဲပေါင်း ၃၀၀ ကျော်ဖြစ်ပွားခဲ့တယ်လို့ KNU က ဆိုပါတယ်။

တိုက်ပွဲအတွင်း စစ်ကောင်စီတပ်က ၂၁၇ ဦးသေဆုံးခဲ့ပြီး ၁၇၁ ဦး ဒဏ်ရာရခဲ့ပေမယ့် KNLA ပူးပေါင်းတပ်တွေဘက်ကတော့ ကိုးဦးသေဆုံးပြီး ၂၇ ဦးဒဏ်ရာရှိခဲ့တယ်လို့ ဆိုပါတယ်။

စစ်ကောင်စီဘက်က ထိခိုက်ကျဆုံးမှု အခြေအနေနဲ့ပတ်သက်လို့ RFA က သီးခြားအတည် မပြုနိုင်သေးပါဘူး။

KNU ထိန်းချုပ်နယ်မြေအတွင်းက တိုက်ပွဲတွေမှာ ထိခိုက်ကျဆုံးမှုတွေရှိတယ်လို့ စစ်ကောင်စီက ထုတ်ပြန်ပေမယ့် အသေးစိတ်အခြေအနေကို ထုတ်ပြန်လေ့မရှိပါဘူး။

KNU က ကရင်ပြည်နယ်၊ မွန်ပြည်နယ်၊ တနင်္သာရီတိုင်းနဲ့ ပဲခူးတိုင်းတွေက နယ်မြေတချို့ကို တပ်မဟာ ခုနစ်ခုနဲ့ ထိန်းချုပ်ထားတာပါ။

စစ်အာဏာသိမ်းပြီးနောက်ပိုင်း KNU ထိန်းချုပ်နယ်မြေမှာ ပစ်ခတ်တိုက်ခိုက်မှုပေါင်း ခုနစ်ထောင် (၇၀၀၀) ကျော် ဖြစ်ပွားခဲ့ပါတယ်။

ကုလသမဂ္ဂ လူသားချင်စာနာမှုဆိုင်ရာညှိနှိုင်းရေးမှူးရုံး (UNOCHA) ရဲ့ စာရင်းတွေအရ စစ်အာဏာသိမ်းပြီးနောက်ပိုင်း ကရင်ပြည်နယ်၊ မွန်ပြည်နယ်၊ ပဲခူးတိုင်းနဲ့ တနင်္သာရီတိုင်းမှာ အရပ်သား နှစ်သိန်းဝန်းကျင် အိုးအိမ်စွန့်ခွာထွက်ပြေးခဲ့ရပါတယ်။