တပ်မတော် ရှင်းလင်းမှုကြောင့် RCSS တပ်ဖွဲ့ဝင်တစ်ဦး သေဆုံး


2018.01.26
rcss-gun-622.jpg RCSS တပ်ဖွဲ့ဝင်ဆီက သိမ်းဆည်းရမိတဲ့ ပစ္စတိုတစ်လက်၊ ၎င်းကျည်အိမ် တစ်ခုနှင့် ကျည် ၆ တောင့်တို့ကို တွေ့ရစဉ်
ဓါတ်ပုံ - တပ်မတော်ကာကွယ်ရေးဦးစီးချုပ်ရုံး ဖေ့စ်ဘွတ်

ရှမ်းပြည်နယ်မြောက်ပိုင်း၊ သီပေါမြို့နယ်အတွင်းက ကျောက်မဲ-သီပေါ ပြည်ထောင်စုကားလမ်းမပေါ်မှာ ခရီးသွားပြည်သူတွေဆီက ဆက်ကြေးကောက်ခံနေတဲ့ ရှမ်းပြည်ပြန်လည်ထူထောင်ရေးကောင်စီ RCSS အဖွဲ့ဝင်တွေကို တပ်မတော်စစ်ကြောင်းက ရှင်းလင်းခဲ့တဲ့အတွက် တစ်ဦး သေဆုံးသွားတယ်လို့ တပ်မတော် ကာကွယ်ရေးဦးစီးချုပ်ရုံးက အခုလ ၂၅ ရက်နေ့ ရက်စွဲနဲ့ သတင်းထုတ်ပြန်ပါတယ်။

ဘော်ကြိုကျေးရွာ အရှေ့မြောက်ဘက် တစ်မိုင်ခွဲခန့်အကွာမှာ ခရီးသွားပြည်သူတွေဆီက ဆက်ကြေးကောက် ခံနေတဲ့ အရပ်ဝတ်နဲ့ RCSS အဖွဲ့ဝင် ၂ ဦးကို တပ်မတော်က ရှင်းလင်းခဲ့ပြီးတစ်ဦးကို အသေဖမ်းဆီးရမိတယ်လို့ သတင်းထုတ်ပြန်ပါတယ်။

RCSS အဖွဲ့ဝင်တွေ  ဆက်ကြေးကောက်ခံနေတာကို တပ်မတော်စစ်ကြောင်းက ခရီးသွားများအသွင်နဲ့ သွားရောက်ရှင်းလင်းခဲ့တာဖြစ်တယ်လို့ ထုတ်ပြန်ချက်မှာ ဖော်ပြပါတယ်။

RCSS အဖွဲ့ဝင်တွေဟာ နယ်မြေကျော် လွန်ဝင်ရောက်ပြီး ခရီးသွားပြည်သူတွေဆီက အဓမ္မဆက်ကြေးကောက် ခံနေတာကြောင့် ခရီးသွားတွေအနေနဲ့ စိုးရိမ်မှုတွေရှိနေပြီး ဘော်ကြိုဘုရားကြီးကို လာရောက်တဲ့ ပြည်တွင်း နဲ့ နိုင်ငံခြားဘုရားဖူးတွေ လာရောက်မှုထိခိုက်လာနိုင်တယ်လို့ ကာကွယ်ရေးဦးစီးချုပ်ရုံးက သတင်းထုတ်ပြန် ပါတယ်။

ဒီသတင်းတွေနဲ့ ပတ်သက်ပြီး RCSS က ပြန်ကြားရေးတာဝန်ရှိသူတွေဖြစ်တဲ့ ဗိုလ်မှူးကြီးစိုင်းငင်း၊ ဒုတိယဗိုလ် မှူးကြီး စိုင်းဦး၊ ဒုတိယ ဗိုလ်မှူးကြီး စိုင်းမိဏ်း၊ ပြန်ကြားရေးဌာနက စိုင်းကျော် တို့က RFA ကဆက်သွယ်ပေမယ့် အဆက်အသွယ် မရသေးပါဘူး။

RCSS ဟာ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးစာချုပ် NCA မှာ လက်မှတ်ရေးထိုးထားတဲ့ တိုင်းရင်းသား လက်နက်ကိုင် တပ်ဖွဲ့တစ်ခုဖြစ်ပါတယ်။

မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။