ပြည်ပရောက်မြန်မာတွေဆီက စစ်ကောင်စီ ဝင်ငွေခွန် ကောက်မည်

ပြည်ပရောက်မြန်မာနိုင်ငံသားတွေရဲ့ ဝင်ငွေတွေထဲက ဆယ်ရာခိုင်နှုန်းကို ဝင်ငွေခွန် ကောက်မယ်လို့ စစ်ကောင်စီက ထုတ်ပြန်ကြေညာလိုက်ပါတယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ကိုယ်တိုင် ပြင်ဆင်ထုတ်ပြန်တဲ့        ၂ဝ၂၃ ခုနှစ် ပြည်ထောင်စုအခွန်အကောက်ဥပဒေအရ အောက်တိုဘာ ၁ ရက်နေ့ကစပြီး ပြည်ပရောက်မြန်မာနိုင်ငံသားတွေ ဝင်ငွေခွန် ပေးဆောင်ရမှာဖြစ်ပါတယ်။

ပြည်ပရောက်မြန်မာနိုင်ငံသားတိုင်းက သက်ဆိုင်ရာနိုင်ငံကသတ်မှတ်ထားတဲ့ ဝင်ငွေခွန်ကိုပေးရတဲ့အပြင် နိုင်ငံသားတွေရဲ့ရရှိထားတဲ့ဝင်ငွေရဲ့ ဆယ်ရာခိုင်နှုန်း ပေးရမှာဖြစ်တယ်လို့ လုံခြုံရေးအရ အမည်မဖော်လိုတဲ့ ရန်ကုန်မြို့က တရားလွှတ်တော်ရှေ့နေတစ်ဦးက ပြောပါတယ်။

“အဲဒီနိုင်ငံတွေမှာ ဘယ်လိုပဲ အခွန်‌ဆောင်နေနေ ကိုယ့်ရဲ့နိုင်ငံကို အခွန်ပြန်ကို ဆောင်ရမယ်။ ဘာအလုပ်ပဲလုပ်နေလုပ်နေ ဝင်ငွေခွန်ခေါင်းစဉ်အောက်မှာ ရလာတဲ့ငွေတွေကို ဆယ်ရာခိုင်နှုန်းထဲကမှ ထပ်ပြီးအခွန်စည်းကြပ်သွားမှာ။ အဲဒီမှာ မဆောင်ခဲ့ဘူးဆိုရင် ဒီကိုဝင်တာနဲ့ ပြန်ကိုဆောင်ရမယ်။ မဆောင်ဘူးဆိုရင် သက်တမ်းကိုရပ်ဆိုင်းတာတို့ကို ဝင်ငွေခွန်ဥပဒေနဲ့ လုပ်နိုင်တယ် ”

မြန်မာနိုင်ငံသားတွေ ပြည်ပနိုင်ငံတွေမှာ နိုင်ငံခြားငွေနဲ့ရရှိတဲ့ လစာဝင်ငွေအပေါ် ဝင်ငွေခွန်ကင်းလွတ်ခွင့်ပြုထားတဲ့ ပြည်ထောင်စုရဲ့ အခွန်အကောက်ဥပဒေ ပုဒ်မ ၃၁ ပုဒ်မခွဲ(က) ပုဒ်မခွဲငယ်(၄)ကို ပယ်ဖျက်လိုက်တာဖြစ်ပြီး ပုဒ်မ ၂၂ ကိုတော့ အစားထိုး ပြင်ဆင်သတ်မှတ်လိုက်တာ ဖြစ်ပါတယ်။

၂ဝ၁၂ ခုနစ်ကစပြီး ပြည်ပရောက်မြန်မာနိုင်ငံသားတွေကို ဝင်ငွေခွန် ကင်းလွတ်ခွင့်ပေးထားတာဖြစ်ပြီး အခုပြန်လည်ကောက်ခံတော့မှာဖြစ်ပါတယ်။

အခုလိုဝင်ငွေခွန် ဥပဒေပြင်ဆင်လိုက်တဲ့အတွက် ပြည်ပနိုင်ငံတွေမှာ သွားရောက်အလုပ်လုပ်ကိုင်နေတဲ့ မြန်မာနိုင်ငံသားတိုင်းကို အခွန်ဆောင်ဖို့ သက်ဆိုင်ရာ မြန်မာနိုင်ငံဆိုင်ရာသံရုံးတွေကတဆင့် ဖိအားပေးလာနိုင်တယ်လို့ ရွှေ့ပြောင်းအလုပ်သမားအရေးဆောင်ရွက်နေသူတွေက ပြောပါတယ်။