လေးကေ့ကော်က အမြောက်ကုန်းစခန်းသိမ်းတိုက်ပွဲ ပြင်းထန်နေ

ကရင်ပြည်နယ် မြဝတီမြို့တောင်ဘက် လေးကေ့ကော်မြို့သစ်က စစ်ကောင်စီ (စွယ်တော်) အမြောက်ကုန်းတပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA)နဲ့ မဟာမိတ်ပူးပေါင်းအဖွဲ့တွေ သိမ်းပိုက်ဖို့ ထိုးစစ်ဆင်တိုက်ခိုက်နေသလို စစ်ကောင်စီဘက်ကလည်း လေကြောင်းကနေ ဗုံးကြဲတိုက်ခိုက်နေတာကြောင့် တိုက်ပွဲပြင်းထန်နေပါတယ်။

စစ်ကောင်စီက သူတို့စစ်စခန်းမဆုံးရှုံးဖို့အတွက် စက်တင်ဘာ ၁၃ ရက် ည ၇ နာရီကျော်အချိန်ကစပြီး Y12 အမျိုးအစား ဗုံးကြဲလေယာဉ်နဲ့ အတွဲလိုက်ဗုံးသီးတွေနဲ့ KNLA မဟာမိတ်ပူးပေါင်းတပ်နေရာတွေကို ဗုံးကြဲတိုက်ခိုက်နေတယ်လို့ KNLA ပူးပေါင်းတပ်ဖွဲ့ တာဝန်ရှိသူတစ်ဦးက RFA ကို ပြောပါတယ်။

"ဒီနေ့(စက်တင်ဘာ ၁၃) က တိုက်ပွဲပိုပြင်းနေတယ်၊ နေ့လယ်က ဒရုန်းဗုံးချတာ အမြောက်ကုန်းထဲမှာ အထိနာနေတယ်၊ အခု ညနေ ၇ နာရီကျော်လောက်ကစကြဲနေတာ အခု ၉ နာရီ ကျော်အထိ ကြဲနေတုန်းပဲ၊ သူတို့လေယာဉ် Y12 က ဗုံးသီးချနေတာ၊ တစ်ခါပတ်ပျံပြီးကြဲချရင် ခုနစ်လုံး၊ ရှစ်လုံး အတွဲလိုက်ကြဲချနေတယ်၊ ၁၀ ခေါက် ကျော်ပြီ၊ ဗုံးသီးတစ်ရာကျော်ရှိပြီပေါ့နော်၊ ကျပေါက်နေတာ၊ လေးကေ့ကော် ရှုခင်းသာကုန်း၊ ပန်းခြံကုန်း၊ မယ်ဝါးခီးရွာဘက်တွေကိုကြဲချနေတာပေါ့"

ပြီးခဲ့တဲ့ဇူလိုင်လကတည်းက ဒီစခန်းဆီ စစ်ကောင်စီရဲ့ စစ်ကူ၊ ထောက်ပို့လုပ်တဲ့ လမ်းပိုင်းတွေကို KNLA မဟာမိတ် ပူးပေါင်းတပ်တွေက ဖြတ်တောက်ပိတ်ဆို့တိုက်ခိုက်ခဲ့ပြီး အခုရက်ပိုင်းမှာတော့ စစ်စခန်းသိမ်းဖို့ ကြိုးစားနေတာလို့ ဆိုပါတယ်။ စစ်ကောင်စီကတော့ စက်တင်ဘာ ၇ ရက်လောက်ကစပြီး စစ်တပ် လေကြောင်းကင်းထောက်ပျံသန်းနေတာလည်းဖြစ်ပါတယ်။

စစ်ကောင်စီက လေကြောင်းကနေ ဗုံးကြဲတိုက်ခိုက်နေတာကြောင့် လေးကေကော်မြို့သစ်က လူနေရပ်ကွက်တွေ၊ မယ်ဝါးခီးရွာ၊ ပန်းခြံကုန်း၊ ရှုခင်းသာကုန်း၊ ကျောက်ဂူတစ်ထောင်ဘုရားကုန်းနေရာတွေအပြင် စစ်တပ်အမြောက်ကုန်းက ထောင်ထားတဲ့မြေမြှုပ်မိုင်းကွင်းနေရာတွေမှာပါ ဗုံးသီးကျရောက်ပေါက်ကွဲတာတွေရှိနေပါတယ်။ ဒီတိုက်ခိုက်မှုကြောင့် အရပ်သားတွေ ထိခိုက်မှုရှိမရှိကို RFA က ဆက်လက်စုံစမ်းနေဆဲဖြစ်ပါတယ်။ စခန်းသိမ်းတိုက်ပွဲအတွင်း နှစ်ဖက် ထိခိုက်သေဆုံးတာတွေရှိနေပေမဲ့ အတိအကျကိုတော့ မသိရသေးပါဘူး။

ဒီစခန်းသိမ်းတိုက်ပွဲအခြေအနေနဲ့ပတ်သက်ပြီး ကရင်ပြည်နယ် လုံခြုံရေးနဲ့ နယ်စပ်ရေးရာဝန်ကြီး ဗိုလ်မှူးကြီး မင်းကျော်သူကို RFA က တယ်လီဖုန်းနဲ့ ဆက်သွယ်မေးမြန်းပေမဲ့ ဖုန်းမဖြေပါဘူး။