လပွတ္တာမြို့မှာ မိုခါမုန်တိုင်းရှောင်သူ ရှစ်ထောင်ကျော် ရှိလာ

ဧရာဝတီတိုင်း၊ လပွတ္တာမြို့ ပေါ်ကို မုန်တိုင်းအတွက် လာရောက်ခိုလှုံသူဟာ ဒီနေ့အထိ လူပေါင်း ရှစ်ထောင်ကျော် အထိရှိလာတယ်လို့ ဒေသခံတွေက RFA ကို ပြောပါတယ်။

ပင်လယ်ကမ်းခြေတွေနဲ့နီးတဲ့ ရေကျော်၊ ကိုင်းတောင်၊ ပြင်စလူ၊ စလူဆိပ်၊ ကွင်းပေါက်၊ သစ်ပုတ်၊ ပဒဲကော စတဲ့ ရွာပေါင်း ၇၀ ကျော်က ဒေသခံတွေဟာ ပြီးခဲ့တဲ့ မေလ ၆ ရက်နေ့လောက်ကစလို့ လပွတ္တာမြို့ ပေါ်ကို လာရောက် ခိုလှုံနေကြတာပါ။

လက်ရှိမှာ မုန်တိုင်းရှောင်ဒေသခံတွေဟာ လပွတ္တာမြို့ပေါ်က ကိုးနဝင်းကျောင်း၊ သရက်တောကျောင်း၊ လေးထပ်ကျောင်း၊ ဓမ္မိကာရုံကျောင်း၊ စည်ပင်သာယာကျောင်း၊ ပရဟိတကျောင်း စတဲ့ ဘုန်းကြီးကျောင်း တွေပေါ်မှာ ခိုလှုံနေကြတယ်လို့ မုန်တိုင်းရှောင်တွေကို ကူညီနေသူတစ်ဦးက RFA ကို ပြောပါတယ်။

"၆ ရက်နေ့ကတည်းက ရောက်နေကြတာပါ။ လပွတ္တာမြို့မှာ ဘုန်းကြီးကျောင်း ၄၀ ကျော်ရှိတယ်။ တစ်ကျောင်းမှာ သုံးရာ၊ လေးရာ ဆံ့သလောက် ထားထားတယ်။ တချို့တွေလည်း သူတို့ဘာသာ ချက်စားကြတာ ရှိသလို ဘုန်းကြီးကျောင်းတွေကလည်း ချက်ကျွေးတယ်၊ ရပ်ကွက်တွေကလည်း ထမင်းထုပ်တွေ နိုင်သလောက် ဝေပေးကြပါတယ်"

ဘင်္ဂလားပင်လယ်အော်မှာ ဖြစ်ပေါ်နေတဲ့ မိုခါမုန်တိုင်းဟာ ပိုမိုအားကောင်းတဲ့ ဆိုင်ကလုန်းမုန်တိုင်းအဖြစ်ကို ရောက်ရှိနေပြီး မုန်တိုင်းလမ်းကြောင်းနဲ့ မလွတ်ကင်းတဲ့ ဒေသတွေနဲ့ ပင်လယ်ကမ်းရိုးတန်းမှာ နေထိုင်သူတွေကို ဘေးလွတ်ရာကို ရှောင်တိမ်းဖို့ မိုးလေဝသနဲ့ ဇလဗေဒညွန်ကြားမှု ဦးစီးဌာနက မေလ ၁၁ ရက် ဒီနေ့မနက်ပိုင်းမှာ ထုတ်ပြန် တိုက်တွန်းထားပါတယ်။ 

မုန်တိုင်းဟာ ကိုကိုးကျွန်းမြို့ရဲ့ အနောက်နဲ့ အနောက်တောင်ဘက် ရေမိုင် ၃၆၅ မိုင်၊ ဟိုင်းကြီးကျွန်းမြို့ရဲ့ အနောက်နဲ့ အနောက်တောင်ဘက် ရေမိုင် ၄၇၅မိုင်၊ စစ်တွေမြို့ရဲ့ တောင်နဲ့ အနောက်တောင်ဘက် ရေမိုင် ၆၁၅ မိုင်က ပင်လယ်ပြင်ကို ဗဟိုပြုနေပါတယ်။

ပြင်စလူရွာကနေ လပွတ္တာမြို့ကို မုန်တိုင်းရှောင်ဖို့ ရောက်ရှိနေတဲ့ ဒေသခံတစ်ဦးကတော့ နာဂစ်လိုမျိုး ထပ်ကြုံရမှာကြောက်တာကြောင့် မုန်တိုင်းသတိပေးချက်တွေကို နားထောင်နေတယ်လို့ ပြောပါတယ်။

"နာဂစ်တုန်းက တစ်မျိုးလုံး ပါသွားခဲ့တာပါ။ အစ်ကို၊ အစ်မ၊ ညီမတွေရော သူတို့ကလေးတွေ၊ ယောကျ်ားတွေ အကုန်မိသားစုလိုက် ပါကုန်တော့၊ ထပ်ဖြစ်မှာ ကြောက်တယ်။ ဒါကြောင့် ရွာမှာ ကျွန်မအရင်ဆုံး မုန်တိုင်းရှောင်ဖို့ ထွက်ခဲ့တာ။ ရွာမှာ Shutter တွေ ရှိပါတယ်။ ဒါပေမဲ့ ရွာလုံးကျွတ်နေဖို့က လူမဆံ့ဘူး၊ အဒါကြောင့် လပွတ္တာကိုပဲ တက်ခဲ့တာ၊ တချို့လူတွေလည်း မြောင်းမြအထိကို တက်ရှောင်ကြတယ်"

လပွတ္တာမြို့ကနေ ပင်လယ်ကမ်းရိုးတန်းရွာတွေကို ပြေးဆွဲနေတဲ့ စက်လှေတွေ၊ အမြန်ရေယာဉ်တွေလည်း မေလ ၁၀ ရက်နေ့ ကတည်းက ဂိတ်တွေပိတ်လိုက်ပြီလို့ ဆိုပါတယ်။

မေလ ၁၃ ရက်နဲ့ ၁၄ ရက်မှာ တိုက်ခတ်နိုင်တဲ့ မိုခါ ဆိုင်ကလုန်းမုန်တိုင်းဒဏ်ကို နိုင်ငံတစ်ဝန်းက ပြည်သူ နှစ်သန်းကျော် ခံစားရနိုင်တယ်လို့ မိုးလေဝသပညာရှင်တွေက ခန့်မှန်းထားပါတယ်။

ဧရာဝတီတိုင်းဟာ ၂၀၀၈ ခုနှစ် မေလ ၂ ရက်နေ့က နာဂစ်ဆိုင်ကလုန်း မုန်တိုင်းဒဏ်ကို အပြင်းထန်ဆုံး ခံခဲ့ရပြီး အနည်းဆုံး လူ ၁၃၈,၃၇၃ ဦး သေဆုံးခဲ့ပါတယ်။ အဲဒီအထဲမှာ လပွတ္တာမြို့နယ် တစ်မြို့နယ်တည်းကနေ သေဆုံးသူ ရှစ်သောင်းခန့် ပါဝင်ပါတယ်။