မုန်တိုင်းကြောင့် ကျောက်တော်မှာ လူ တစ်ထောင်နီးပါး အိုးမဲ့အိမ်မဲ့ဖြစ်
2023.05.17
မိုခါမုန်တိုင်းကြောင့် ကျောက်တော်မြို့နယ်၊ အောက်ယွန်းချောင်းကျေးရွာမှ အပျက်အစီးများအား ၂၀၂၃ ခုနှစ် မေလ ၁၇ ရက်နေ့က တွေ့ရစဉ်။
Citizen Journalist
မိုခါမုန်တိုင်းကြောင့် ရခိုင်ပြည်နယ်မြောက်ပိုင်း၊ ကျောက်တော်မြို့နယ်၊ အောက်ယွန်းချောင်းကျေးရွာက နေအိမ်အားလုံးနီးပါးပျက်စီးခဲ့ပြီး လူဦးရေ တစ်ထောင်နီးပါး အိုးမဲ့အိမ်မဲ့ဖြစ်ကာ စားဝတ်နေရေးခက်ခဲနေတယ်လို့ ဒေသခံတွေက ပြောပါတယ်။
အောက်ယွန်းချောင်းရွာမှာ နေအိမ် ၂၀၀ ရှိပြီး အဲဒီထဲက အိမ် ငါးလုံးသာကျန်တယ်လို့ ပြောပါတယ်။
လောလောဆယ် ဒေသခံတွေဟာ တဲထိုးပြီးဖြစ်သလို နေထိုင်နေကြတယ်လို့ အောက်ယွန်းချောင်း ရွာသားတစ်ဦးက ပြောပါတယ်။
“အခုက တဲတွေ ဘာတွေထိုးပြီးနေကြတယ်။ မိုးတွေရွာရင်တော့ ဘုန်းကြီးကျောင်းမှာ သွားခိုကြရတယ်။ ကျောက်တော်မြို့ပေါ်ကို သွားဖို့ကလည်း လမ်းခရီးကခက်သလို၊ ဟိုကနေလာကူကြဖို့လည်း ခက်တော့ နေထိုင်စားသောက်ရေး ခက်နေတာပေါ့”
မေလ ၁၇ ရက် ဒီနေ့အထိ ကယ်ဆယ်ကူညီရေးအဖွဲ့တွေ ရောက်မလာသေးတဲ့အတွက် ကလေးနဲ့ သက်ကြီးရွယ်အိုတွေအပြင် နာမကျန်းသူတွေအားလုံး အခက်အခဲဖြစ်နေတယ်လို့ သူက ပြောပါတယ်။
နေအိမ်တွေပျက်စီးသွားပေမဲ့ အောက်ယွန်းချောင်းရွာမှာ ထိခိုက်သေဆုံးတာ မရှိပါဘူး။
ရခိုင်ပြည်နယ်မြောက်ပိုင်း စစ်တွေမြို့အနီးကနေ မေလ ၁၄ ရက်နေ့က ဖြတ်ကျော် ဝင်ရောက်ခဲ့တဲ့ မိုခါ မုန်တိုင်းကြောင့် စစ်တွေ၊ ပုဏ္ဏားကျွန်း၊ ကျောက်တော်၊ ရသေ့တောင်မြို့နယ်တွေမှာ နေအိမ်တွေ ရာနှုန်းပြည့်နီးပါး ပျက်စီးသွားတယ်လို့ ဒေသခံတွေက ပြောပါတယ်။
ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ရခိုင်ပြည်နယ်နဲ့ မြန်မာနိုင်ငံအနောက်မြောက်ပိုင်း မုန်တိုင်းဖြတ်ကျော်သွားတဲ့ လမ်းကြောင်းမှာ နေထိုင်သူ လူဦးရေ ၅ ဒသမ ၄ သန်းကျော်လောက် မုန်တိုင်းဒဏ်သင့်တယ်လို့ ခန့်မှန်းထားပါတယ်။
ဖတ်ရှုသူအများဆုံး သတင်းများ။
RFA
- ဗိုလ်ချုပ်မှူးကြီးမင်းအောင်လှိုင်ကို လက်နက်ကြီးနဲ့ တိုက်ခိုက်ခဲ့ကြောင်း KNDF ပြော
- မြန်မာအလုပ်သမား ဇနီးမောင်နှံ ထိုင်းထီ ဘတ် ခြောက်သန်းဆုပေါက်
- ထိုင်းနိုင်ငံက မြန်မာကလေး တစ်ထောင်ကျော် ပညာသင်နေတဲ့ကျောင်း အပိတ်ခံရ
- ဘာသာရေးခေါင်းဆောင် သုံးယောက်ကို လူ့အခွင့်အရေးကော်မရှင်အဖွဲ့ဝင်အဖြစ် စစ်ကောင်စီခန့်အပ်
- အာဆီယံ ကာကွယ်ရေးဦးစီးချုပ်များ အစည်းအဝေး စစ်ကောင်စီ ကိုယ်စားလှယ် တက်ရောက်
ဖတ်ရှုသူအများဆုံး သတင်းများ။
သတင်းများ
