ကျိုက်ထိုမှာ စစ်တပ်ခြေကုပ်ယူထားတဲ့နေရာတွေ တိုက်ခိုက်ခံရ

မွန်ပြည်နယ် ကျိုက်ထိုမြို့နယ်ထဲမှာ စစ်ကောင်စီတပ်စွဲထားတဲ့နေရာတွေကို ဒရုန်းတွေ၊ လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ ကျိုက်ထိုတော်လှန်ရေး အင်အားစုတွေကထုတ်ပြန်ပါတယ်။

စစ်ကောင်စီတပ်တွေ တပ်စွဲထားတဲ့ မုပ္ပလင် စစ်ဆေးရေးလမ်းဆုံဂိတ်၊ ရွှေစေတီနဲ့ ငွေစေတီ ဘုရားကုန်း၊ လက်ပံပင်သချိုင်းကုန်း၊ အင်္ဂဘိုတာဝါတိုင်စတဲ့နေရာတွေကို ဧပြီလ ၆ ရက် မနေ့က ပစ်မှတ်ထားတိုက်ခိုက်ခဲ့တာပါ။

ဒေသခံတော်လှန်ရေးတပ်တွေ ပူးပေါင်းတိုက်ခိုက်ခဲ့တာဖြစ်ပြီး ဒရုန်းနဲ့ ဗုံးကြဲတိုက်ခိုက်တာအပြင် ၆ဝ မမ လက်နက်ကြီးတွေနဲ့ပါသုံးပြီး ပစ်ခတ်ခဲ့တယ်လို့ ဆိုပါတယ်။

တိုက်ပွဲအတွင်း စစ်ကောင်စီတပ်ဖွဲ့ဘက်က ၉ ဦးသေဆုံးခဲ့ပြီး ဒေသခံတော်လှန်ရေးတပ်တွေဘက်က ထိခိုက်သေဆုံးတာမရှိဘူးလို့ ကျိုက်ထိုတော်လှန်ရေး အင်အားစုတပ်ဖွဲ့ဝင်တစ်ဦးက RFA ကိုပြောပါတယ်။

အဲဒီလိုတိုက်ခိုက်ခံရပြီးနောက် စစ်ကောင်စီဘက်ကလည်း မုပ္ပလင် စစ်ဆေးရေးလမ်းဆုံဂိတ်ကနေ လက်နက်ကြီးတွေနဲ့ ရမ်းသန်းပစ်ခတ်နေတယ်လို့ ဆိုပါတယ်။

" ဒီနေ့ည ခုနစ်နာရီထိ လက်နက်ကြီးတွေနဲ့ ရမ်းသန်းပစ်နေတယ်။ ကျွန်တော်တို့ဘက်က ဒီနေ့ တိုက်တာမရှိဘူး။ သူတို့ဘက်ကပဲ ပစ်နေတယ်။ အရပ်သားတွေ ထိခိုက်သေဆုံးတာတော့မရှိဘူး"

စစ်ကောင်စီဘက်ကတော့ ကျိုက်ထိုဘက်က အခြေအနေတွေကို ဘာမှပြောဆိုတာ မရှိသေးပါဘူး။ တော်လှန်ရေးအင်အားစုတွေဘက်ကတော့ ကျိုက်ထိုမှာ စစ်ရေးအရှိန်မြှင့်ထားတယ်လို့ ဆိုပါတယ်။