ရေးမြို့နယ်မှာ စစ်ရေးတင်းမာနေပြီး ဒေသခံ ၁၅၀၀၀ တိမ်းရှောင်နေရကြောင်း KNU ထုတ်ပြန်

မွန်ပြည်နယ် ရေးမြို့နယ်က ကရင်အမျိုးသားအစည်းအရုံး (KNU) တပ်မဟာ (၆) ထိန်းချုပ်နယ်မြေကို စစ်ကောင်စီတပ်က အင်အား ၂၀၀ ဝန်းကျင်နဲ့ အင်အားဖြည့်တင်းမှု တွေလုပ်နေတာကြောင့် စစ်ရေးတင်းမာနေပြီး အရပ်သား ၁၅၀၀၀ ကျော် ထွက်ပြေးနေရ တယ်လို့ စက်တင်ဘာလ ၁၆ ရက်မှာ KNU က ထုတ်ပြန်ပါတယ်။

ကျိုက်ထိုအခြေစိုက် ခြေမြန်တပ်မ ၄၄ လက်အောက်ခံ မြေလျင်တပ်ရင်း - ၂ နဲ့ အမြောက် တပ် ၃၁၈၊ အရှေ့တောင်တိုင်း စစ်ဌာနချုပ်လက်အောက်ခံ နယ်ခြားစောင့်တပ်ရင်း ၁၀၂၁ နဲ့ နယ်ခြားစောင့်တပ်နယ် ၃ က အင်အား ၁၀၀ နီးပါးဟာ KNLA တပ်ရင်း ၁၆ ရှိတဲ့ ဒေသတွေ ကို ထိုးစစ်ဆင်လာတဲ့အတွက် စက်တင်ဘာလ ၁၄ ရက်ကစပြီး တိုက်ပွဲဖြစ်ပွားခဲ့ပါတယ်။

အဲဒီနေ့ တိုက်ပွဲအတွင်း စစ်ကောင်စီတပ်က Mi- 35 တိုက်ခိုက်ရေးရဟတ်ယာဉ်နဲ့ ပစ်ခတ်ခဲ့တာကြောင့် KNLA တပ်ဖွဲ့ဝင်တစ်ဦး သေဆုံးခဲ့တယ်လို့ KNU ထုတ်ပြန်ချက်မှာ ဖော်ပြပါတယ်။

စက်တင်ဘာလ ၁၅ ရက်မှာလည်း နယ်ခြားစောင့်တပ်ရင်း ၃ က နောက်ထပ် တပ်သား အင်အား ၁၀၀ ထပ်မံအင်အားဖြည့်တင်းလာတာကြောင့် နှစ်ဖက်တပ်တွေအကြား စစ်ရေးတင်းမာနေတယ်လို့ ဆိုပါတယ်။

ဒါနဲ့ပတ်သက်လို့ စစ်ကောင်စီရဲ့ မွန်ပြည်နယ် ပြောရေးဆိုခွင့်ရှိသူ ဒေါက်တာ အောင်မြတ်ကျော်စိန်ကို RFA က တယ်လီဖုန်းနဲ့ ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။

ဒီစစ်ကြောင်းထိုးမှုအတွင်း ဒေသခံ ၁၅၀၀၀ ကျော် အိုးအိမ်စွန့်ခွာထွက်ပြေးနေရပြီး ရေးမြို့နယ်မှာ မိုးအဆက်မပြတ် ရွာသွန်းနေတာ၊တောင်ကျရေ စီးဆင်းမှုကြမ်းတာတွေ ကြောင့် အမိုးအကာနဲ့ နေစရာအခက်အခဲတွေရှိနေတယ်လို့ KNU က ထုတ်ပြန်ထားပါတယ်။