ကျွန်းလှနဲ့ ကန့်ဘလူက စစ်ဘေးဒုက္ခသည် ငါးသောင်းနီးပါး ဆေးဝါးနဲ့ရိက္ခာ လိုအပ်နေ

RFA Burmese
2022.11.27
Share on WhatsApp
Share on WhatsApp
ကျွန်းလှနဲ့ ကန့်ဘလူက စစ်ဘေးဒုက္ခသည် ငါးသောင်းနီးပါး ဆေးဝါးနဲ့ရိက္ခာ လိုအပ်နေ ၂၀၂၂ ခုနှစ်၊ အောက်တိုဘာလ ၄ ရက်နေ့တွင် ထွက်ပြေးတိမ်းရှောင်နေကြရသည့် စစ်ကိုင်းတိုင်း၊ ကန့်ဘလူမြို့နယ်၊ ဇော်ချောင်းရွာမှ ဒေသခံများကို တွေ့ရစဉ်။
ကျွန်းလှတက်ကြွလှုပ်ရှားသူများအဖွဲ့

စစ်ကိုင်းတိုင်း၊ ကျွန်းလှနဲ့ ကန့်ဘလူမြို့နယ်က ရွာတွေကို ပြီးခဲ့တဲ့ နိုဝင်ဘာလ ၁၁ ရက် နေ့ကစလို့ စစ်ကောင်စီတပ်တွေ စစ်ကြောင်းထိုးဝင်ရောက်ပြီး နေအိမ်တွေ မီးရှို့ဖျက်ဆီး နေတာကြောင့် ဘေးလွတ်ရာ ထွက်ပြေးနေရတဲ့ ဒေသခံ ငါးသောင်းနီးပါးအတွက် စားနပ်ရိက္ခာနဲ့ ဆေးဝါးအကူအညီတွေ လိုအပ်နေတယ်လို့ ဒေသခံတွေက ပြောပါတယ်။

ကန့်ဘလူတစ်မြို့နယ်လုံးမှာတင် စစ်ဘေးဒုက္ခသည် အရေအတွက် လေးသောင်းနီးပါးအထိ ရှိလာပြီး စားနပ်ရိက္ခာအပြင် ဆေးဝါးအကူအညီတွေပါ လိုအပ်နေတယ်လို့ ကန့်ဘလူမြို့ ဒေသခံတစ်ဦးက RFA ကိုပြောပါတယ်။

"စစ်ဘေးရှောင်ရတာလည်း အတည်တကျ မရှိဘူး။ ဟိုပြေးဒီပြေးနဲ့ တောတွေထဲ ရှောင်နေရတာ။ နေမကောင်း၊ ဖျားနာလို့ရှိရင် ရွာတွေက ကျန်းမာရေးဝန်ထမ်းတွေနဲ့ လူငယ်လေးတွေက ကူညီပေးတယ်။ ဆေးဝါးကျတော့ ရဖို့ခက်ခဲတယ်။ ရှိတဲ့ဆေးနဲ့ပဲ ကူညီပေးနေရတာပေါ့။ သက်ကြီးပိုင်းတွေဆို ဖျားနာလာတာတွေ ရှိလာပြီ။ အခုက ရာသီဥတုကလည်း ပြောင်းလာတော့လေ"

စစ်ကိုင်းတိုင်းထဲက ကန့်ဘလူ၊ ကျွန်းလှ၊ ခင်ဦးနဲ့ တန့်ဆည်မြို့နယ်တွေကို စစ်ကောင်စီ တပ်တွေက အခုရက်ပိုင်း ပြင်းပြင်းထန်ထန် ထိုးစစ်ဆင်နေတာလို့ ဒေသခံတွေက ပြောပါတယ်။

ပြီးခဲ့တဲ့ နိုဝင်ဘာလ ၂၁ ရက်နေ့ကလည်း ကျွန်းလှမြို့၊ ခဝါသည်ရွာကို စစ်ကောင်စီ တပ်သားတွေ မီးရှို့ခဲ့တာကြောင့် နေအိမ် ၉၅ လုံး ပျက်စီးခဲ့ပြီး အိုမဲ့အိမ်မဲ့ဖြစ်သွားတဲ့ ဒေသခံ ၅၀၀ ကျော်အတွက်လည်း စားနပ်ရိက္ခာတွေ လိုအပ်နေတယ်လို့ ကျွန်းလှ ဒေသခံတွေက RFA ကို ပြောပါတယ်။

ခဝါသည်ရွာမှာ နေအိမ်တွေအပြင် ဒေသခံတွေရဲ့ စားနပ်ရိက္ခာတွေ၊ အဝတ်အထည်နဲ့ အသုံးအဆောင်တွေပါ မီးရှို့ဖျက်ဆီးခံခဲ့ရသလို အနီးနားရွာ ၁၀ ရွာက ဒေသခံ ခုနစ်ထောင် ကျော်လည်း နေရပ်စွန့်ခွာ ထွက်ပြေးနေရတယ်လို့ ကျွန်းလှတက်ကြွလှုပ်ရှားသူများ အဖွဲ့တာဝန်ခံက RFA ကို ပြောပါတယ်။

ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးမှူးရုံး (UNOCHA) ရဲ့ အောက်တိုဘာလ ၃၁ ရက်နေ့ ထုတ်ပြန်ချက်အရ စစ်တပ်အာဏာသိမ်းပြီးနောက် မလုံခြုံမှုနဲ့ ပဋိပက္ခတွေ ကြောင့် စစ်ကိုင်းတိုင်းမှာ ဒေသခံ ၆၁၂,၄၀၀ ဦး အိုးအိမ်စွန့်ခွာ ထွက်ပြေးနေရပါတယ်။

မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။