စစ်အစိုးရအပေါ် နိုဘယ်လ်ဆုရှင်များ မျှော်လင့်ချက်ကုန်

တကယ်တမ်းမှာ ရွေးကောက်ပွဲဟာ ဒီမိုကရေစီစနစ်အတွက် အရေးကြီးတဲ့ အဆင့်ဖြစ်သလို အခြေခံ ပြုပြင် ပြောင်းလဲဖို့အတွက် နိုင်ငံရေးအရ မရှိမဖြစ် လိုအပ်ပေမဲ့ မြန်မာပြည်က ရွေးကောက်ပွဲကတော့ ဒီသတ်မှတ်ချက်တွေနဲ့ မကိုက်ညီဘူးလို့ သူတို့ရဲ့ ကြေညာချက်မှာ ဖော်ပြထားပါတယ်။

နိုင်ငံတကာ အသိုင်းအဝိုင်းအနေနဲ့လည်း ဒီရွေးကောက်ပွဲကို အသိအမှတ်မပြုကြဖို့ တိုက်တွန်းပါတယ်လို့ သူတို့အဖွဲ့ဖြစ်တဲ့ Nobel Women's Initiative ရဲ့ပြောခွင့်ရအမျိုးသမီး Janhabi Nandy က ပြောပါတယ်။

ကျမတို့ရဲ့ အဓိက စိုးရိမ်ချက်က စစ်အစိုးရကျင်းပတဲ့ ရွေးကောက်ပွဲကို ကုလသမဂ္ဂ အပါအဝင် နိုင်ငံတကာ အစိုးရတွေက ဒီမိုကရေစီစနစ်ကို ရှေ့ရှုတဲ့အဆင့်အဖြစ် မသတ်မှတ်ကြဖို့ပါပဲ။ ဒီရွေးကောက်ပွဲမှာ ပြဿနာတွေ ရှိနေပြီး အမျိုးသား ဒီမိုကရေစီအဖွဲ့ချုပ်နဲ့ သက်ဆိုင်သူအားလုံး ပါဝင်ခွင့်လည်း မရပါဘူး။ ရွေးကောက်ပွဲရဲ့ ရည်ရွယ်ချက်ကိုက စစ်အုပ်ချုပ်ရေးနဲ့ ဒီမိုကရေစီနည်းမကျတဲ့ ဖွဲ့စည်းပုံ အခြေခံဥပဒေ တည်တံ့ဖို့အတွက် ဖြစ်ပါတယ်လို့ သူက ပြောသွားတာပါ။ နိုင်ငံတကာ အသိုင်းအဝိုင်းအနေနဲ့ မြန်မာပြည် လွတ်မြောက်ရေးအတွက် ဝိုင်းဝန်း တောင်းဆိုကြဖို့ လိုတယ်လို့လည်း ကြေညာချက်မှာ ဖော်ပြထားပါတယ်။

ဒါ့အပြင် နိုင်ငံရေး အကျဉ်းသားအားလုံးကို လွှတ်ပေးပြီး စစ်မှန်တဲ့ တွေ့ဆုံဆွေးနွေးရေး ပြုလုပ်ဖို့ စစ်အစိုးရကို တိုက်တွန်းထားပါတယ်။

Nobel Women's Initiative အဖွဲ့အနေနဲ့ မြန်မာနိုင်ငံက လူသားမျိုးနွယ်စုအပေါ် ရာဇဝတ်မှုကျုးလွန်တဲ့ ဖြစ်ရပ်တွေ၊ စစ်ရာဇဝတ်မှုတွေနဲ့ ပတ်သက်ပြီး ကုလသမဂ္ဂ စုံစမ်းရေးကော်မရှင် ဖွဲ့စည်းဖို့ ဆက်လက် တောင်းဆိုသွားမှာ ဖြစ်တယ်လို့ ပြောခွင့်ရအမျိုးသမီး Janhabi Nandy က RFA ကို ပြောဆိုခဲ့ပါတယ်။