ဥပဒေလိုက်နာဖို့ ဧရာဝတီ သတင်းဌာနကို အကြောင်း ကြားထား

ထိုင်းနိုင်ငံချင်းမိုင်အခြေစိုက် ဧရာဝတီ မြန်မာဘာသာ အပတ်စဉ်သတင်းဂျာနယ်နဲ့ ဧရာဝတီမဂ္ဂဇင်း အင်္ဂလိပ် ဘာသာတို့ကို ထုတ်ဝေခွင့်သက်တမ်းတိုးရာမှာ တည်ဆဲ ဥပဒေနဲ့အညီလိုက်နာဖို့ အကြောင်းကြားထားတယ် လို့ ပြန်ကြားရေးဝန်ကြီးဌာနက အစိုးရသတင်း မီဒီယာတွေကနေ ဒီကနေ့ သတင်းထုတ် ပြန်ပါတယ်။

တည်ဆဲဥပဒေတစ်ရပ်ဖြစ်တဲ့ စကားရပ်များပြောင်းလဲ သတ်မှတ်သည့် ဥပဒေနဲ့အညီ လိုက်နာဆောင်ရွက်ဖို့ အခုလို ညွှန်ကြားရတာဖြစ်တယ် လို့ ပြန်ကြားရေးဝန်ကြီး ဌာန ပြန်ကြားရေးနဲ့ ပြည်သူ့ဆက်ဆံရေးဦးစီးဌာန ညွှန်ကြားရေးမှူးချုပ် ဦးရဲတင့်က RFA ကို ပြောပါတယ်။

"ကျနော်ကို လက်ရှိတည်ဆဲဥပဒေရှိပါတယ်၊ စကားရပ် များ ပြောင်းလဲ သတ်မှတ်သည့် ဥပဒေပါ ၁၉၈၉ ဇွန်လ ၁၈ ရက်နဲ့ထုတ်ထားတဲ့ ဥပဒေပါ၊ အဲ့ဥပဒေရဲ့နောက် ဆက်တွဲ ညွှန်ကြားချက်တွေရှိပါတယ်၊ ဥပမာ အရင်တုန်း က မကွေးဆိုရင် မာကွေးဆိုပြီး လုပ်ခဲ့တာရှိတယ်လေ၊ အဲ့ဒါတွေကို လက်ရှိတစ်ကယ်ကျတော့ ၁၉၈၉ ခုနှစ်မှာပဲ အမိန့်ရော၊ ဥပဒေရောထွက်ပြီးသားပါ၊ လက်ရှိသုံးစွဲနေ တဲ့ဟာတွေကို အင်္ဂလိပ်ဘာသာ ရပ်နဲ့ဆို Union of Burma၊ Union of Myanmar စကားရပ် စသည်ဖြင့် သူကသုံး စွဲဖို့ရာတွက် ထုတ်ထားတဲ့ ဥပဒေနဲ့ ညွှန်ကြားချက် ရှိပါတယ်၊ အဲ့ဒါတွေက သုံးစွဲဖို့ပါခင်ဗျ၊ ဆိုတာက Irrawaddy ဆိုတာ မဟုတ်တော့ပါဘူး၊ ကျနော်တို့ အားလုံးသုံးနေတာ ဧရာဝတီ ဖြစ်ပါတယ်"

မူလခွင့်ပြုပြီးထုတ်ဝေခွင့်ကို ပြန်တင်ရာမှာ တည်ဆဲဥပဒေငြိစွန်းတယ်လို့ မှတ်ချက်ပေးတာဟာ မြန်မာနိုင်ငံ က ပြုပြင်ပြောင်းလဲရေးတွေ နောက်ကြောင်းပြန်တယ် လို့ နိုင်ငံတကာက ဝေဖန်တဲ့အချိန်နဲ့ တချိန်ထဲဖြစ်နေတဲ့အတွက် စိတ်ဝင်စားစရာဖြစ်နေတယ်လို့ ဧရာဝတီသတင်းဌာန အယ်ဒီတာချုပ် ဦးအောင်ဇော်က ပြောပါတယ်။

" အခုလို နောက်ကိုပြန်ဆုတ်နေတယ်ဆိုပြီး အားလုံးကပြောနေကြတဲ့ အချိန်မှာ ဒါကလဲ ကျနော်တို့ကို အခုလိုမျိုး ဖိအားပေးတယ်ဆိုတာလဲ ကျနော်ထင်တယ်၊ ဒါကလဲ အနုတ်လက္ခဏာပြတဲ့ တစ်ခုပဲလို့ပဲမြင်ပါတယ်၊ နောက်ပြီးတော့ သမ္မကြီး ဦးသိန်းစိန်ကိုယ်တိုင်က အားလုံးကို ပြန်လာဖို့ဖိတ်ထားတယ်၊ ဒါကြောင့်ပြန်သွားကြတယ်၊ ဒါပေမယ့် အခုချိန် မှာ ဒီလိုမျိုးလုပ်ရင် ဒါဟာ ဦးသိန်းစိန်အစိုးရရဲ့ ပေါ်လစီလား ဒါမှမဟုတ်ရင် ဘယ်သူရဲ့ပေါ်လစီလဲပေါ့လေ၊ ဒါတွေကမေးခွန်းထုတ်စရာဖြစ်တယ်"

ဒီဇင်ဘာ ၂ ရက်နေ့က ထုတ်ဝေခွင့်သက်တမ်းတိုးရာမှာ အခုလို မှတ်ချက် ပေးအကြောင်းပြန်ခဲ့တာဖြစ်ပြီး ၁၉၈၉ နိုင်ငံတော် ငြိမ်ဝပ်ပိပြားမှု တည်ဆောက်ရေး ဥပဒေ အမှတ် ၁၅/၈၉ နဲ့ငြိစွန်းနေကြောင်း၊ အင်္ဂလိပ်ဘာသာ ဧရာဝတီကို ကုမ္ပဏီတံဆိပ် Trade Mark/Logo အနေနဲ့ ခွင့်ပြုမှာဖြစ်ပေမဲ့ ထုတ်ဝေခွင့်အမည် စာသားအသုံး အနှုန်းကိုတော့ တည်ဆဲဥပဒေအရ ပြောင်းလဲရမယ်လို့ ဖော်ပြထားပါတယ်။

ဒီလိုအကြောင်းကြားတာနဲ့ပတ်သက်ပြီး ဧရာဝတီသတင်းဌာနက ဒီကနေ့ညနေပိုင်းက ကြေညာချက် ထုတ်ပြန်ပြီး မူလတင်ပြထားတဲ့အတိုင်း ဆက်လက် လုပ်ဆောင်သွားမယ်လို့ ပြောကြားထားပါတယ်။

ပြန်ကြားရေးဝန်ကြီးဌာန ပြန်ကြားရေးနဲ့ ပြည်သူ့ဆက်ဆံရေးဦးစီးဌာန ညွှန်ကြားရေးမှူးချုပ် ဦးရဲတင့်ကို RFA အဖွဲ့သား ကိုကျော်ကျော်အောင်က ဆက်သွယ်မေးမြန်းထားတာ နားဆင်နိုင်ပါတယ်။

ဧရာဝတီသတင်းဌာနက အယ်ဒီတာချုပ် ဦးအောင်ဇော်ကို RFA အဖွဲ့သား ကိုကျော်မင်းထွန်းက ဆက်သွယ်မေးမြန်းထားပါတယ်။