ရန်ကုန်နဲ့နယ် မြို့ကြီးတွေမှာ NDF အမတ်လောင်းတချို့ မဲအသာစီးရနေ

ရန်ကုန်တိုင်း လမ်းမတော်မြို့နယ်မှာ NDF ကိုယ်စားလှယ် ဒေါက်တာတင့်ဆွေဟာ မဲရေတွက်ပြီး မဲရုံ ၂၁ ရုံမှာ ၁၇ ရုံလုံး အနိုင်ရထားတဲ့အတွက် နိုင်ပြီလို့ ပြောလို့ရလောက်အောင် သေချာနေတယ်လို့ ပါတီခေါင်းဆောင် ဦးခင်မောင်ဆွေက ပြောပါတယ်။

၈၈ မျိုးဆက် ဒီမိုကရေစီရေး လှုပ်ရှားခဲ့သူ လူငယ်တွေနဲ့ ဖွဲ့ထားတဲ့ ပြည်ထောင်စု ဒီမိုကရေစီပါတီ UDP က အထွေထွေ အတွင်းရေးမှူး ဦးသိန်းတင်အောင် ဟာလည်း ပြိုင်ဘက် အဓိကပါတီတွေ ဖြစ်တဲ့ စစ်အစိုးရ ကျောထောက်နောက်ခံ ပေးထားတဲ့ ကြံ့ခိုင်ရေးနဲ့ ဖွံ့ဖြိုးရေးပါတီနဲ့ တိုင်းရင်းသား စည်းလုံးညီညွတ်ရေးပါတီ (တစည) ကိုယ်စားလှယ်လောင်းတွေထက် မဲ အသာစီးရနေတယ်လို့ သိရပါတယ်။

မန္တလေးတိုင်း ဘက်မှာတော့ NDF ပါတီက အမျိုးသားလွှတ်တော်အတွက် ကိုယ်စားလှယ် ၅ ဦး မဲအများစုနဲ့ အနိုင်ရထားတယ်လို့ သိရပါတယ်။

ကြံ့ခိုင်ရေးနဲ့ ဖွံ့ဖြိုးရေးပါတီက အထွေထွေ အတွင်းရေးမှူးနဲ့ လက်ရှိ လယ်ယာစိုက်ပျိုးရေးဝန်ကြီး ဦးဌေးဦးဟာ ဧရာဝတီတိုင်း ဟင်္သာတမြို့နယ်ကနေ မဲအနိုင်ရပြီး ပြန်ကြားရေးဝန်ကြီး ဦးကျော်ဆန်းဟာ ပုလဲနယ်ကနေ အနိုင်ရထားတယ်လို့ သတင်းတချို့က ဆိုပါတယ်။

ဒါပေမယ့် RFA က စုံစမ်းမေးမြန်းနေစဉ် မဲရေတွက်နေဆဲ ဖြစ်ပြီး အတိအကျ စာရင်းရဖို့ ကြာနိုင်သလို တရားဝင် ရွေးကောက်ပွဲ ကော်မရှင်က ကြေငြာချက်ကလည်း ရက်အနည်းငယ် ကြာနိုင်တယ်လို့ သိရပါတယ်။

နိုဝင်ဘာလ ၇ ရက်နေ့ ည ၈ နာရီအထိ မဲအနိုင်အရှုံး ရလာဒ်တွေနဲ့ ပတ်သက်ပြီး အမျိုးသား ဒီမိုကရေစီအင်အားစု NDF ခေါင်းဆောင် ဦးခင်မောင်ဆွေနဲ့ ပြည်ထောင်စု ဒီမိုကရေစီပါတီက ပြောခွင့်ရသူတဦးကို RFA ကိုကျော်မင်းထွန်းက ဆက်သွယ် မေးမြန်းထားတာကိုလည်း တဆက်ထဲနားဆင်နိုင်ပါတယ်။

	UDP နဲ့ ဆက်သွယ်မေးမြန်းချက်။
	အသံဖိုင်ယူရန်။

	NDF နဲ့ ဆက်သွယ်မေးမြန်းချက်။
	အသံဖိုင်ယူရန်။