ဖောင်းပြင်နဲ့ မော်လူးမှာ စာသင်ကျောင်းနဲ့ဆေးရုံ ဗုံးကြဲခံရ

စစ်ကိုင်းတိုင်း ဖောင်းပြင်မြို့နယ် ကောင်းမောင်းရွာ စာသင်ကျောင်းနဲ့ မော်လူးမြို့ တိုက်နယ်ဆေးရုံတို့ကို နိုဝင်ဘာလ ၅ ရက်နေ့မှာ စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် စစ်ဘေးဒုက္ခသည် တစ်ဦး သေဆုံးပြီး သုံးဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

ဒီတိုက်ခိုက်မှုမှာ မော်လူးမြို့က တိုက်နယ်ဆေးရုံအဆောက်အအုံ ပျက်စီးခဲ့ပါတယ်။ ကောင်းမောင်းရွာ စာသင်ကျောင်းမှာတော့ စစ်ဘေးဒုက္ခသည်တွေ ခိုလှုံနေတာဖြစ်ပြီး ဗုံးကြဲတိုက်ခိုက်မှုကြောင့် စစ်ဘေးဒုက္ခသည် သေဆုံးပြီး သုံးဦး ဒဏ်ရာခဲ့တယ်လို့ ဒေသခံတစ်ဦးက ပြောပါတယ်။

“မော်လူး တိုက်နယ်ဆေးရုံကို ဗုံးနှစ်လုံးကြဲတာ တစ်လုံးကတော့ မကွဲသွားဘူး။ အဲဒီမှာ ဆေးရုံ အဆောင်နှစ်ဆောင် ပျက်စီးသွားတယ် လူတော့ မထိဘူး။ ဖောင်းပြင်ကတော့ စစ်ရှောင်တွေရှိတဲ့ စာသင်ကျောင်းကို ကြဲတာ။ ဗုံးသီး ၁၂ လုံးကျတာ စာသင်ကျောင်းကို။ ဘာမှတိုက်ပွဲမရှိပဲနဲ့ ဒီတိုင်းလာကြဲတာ။ အဲမှာက စစ်ရှောင်အမျိုးသား တစ်ဦး သေတယ်။ သုံးယောက် ဒဏ်ရာရတယ်”

စစ်ဘေးဒုက္ခသည် မြင်သာရွာခံ အသက် ၄၀ အရွယ် ကိုမင်းထွဋ်သေဆုံးခဲ့တာ ဖြစ်ပါတယ်။ ဒဏ်ရာရသူတွေကတော့ ၁၀ နှစ်အောက် ကလေး နှစ်ဦးနဲ့ အမျိုးသမီး တစ်ဦးတို့ဖြစ်ပြီး အဲဒီအမျိုးသမီးက အသက်အန္တရာယ် စိုးရိမ်ရတယ်လို့ သူက ပြောပါတယ်။

ဒီကိစ္စနဲ့ ပက်သက်လို့ စစ်ကောင်စီရဲ့ စစ်ကိုင်းတိုင်း ပြောခွင့်ရသူထံ RFA က တယ်လီဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုတာ မရှိသေးပါဘူး။

အင်းတော်မြို့နယ် မော်လူးမြို့ကို ကာကွယ်ရေးပူးပေါင်းတပ်တွေက ၂၀၂၃ ဒီဇင်ဘာလ ၁၃ ရက်နေ့မှာ သိမ်းယူထားတာ ဖြစ်ပါတယ်။

အင်းတော်မြို့ပေါ်မှာတော့ မြို့သိမ်းတိုက်ပွဲ ပြင်းထန်နေဆဲဖြစ်ပြီး စစ်ကောင်စီတပ်ကလည်း လေကြောင်းကနေ နေ့စဉ်လိုလို ဗုံးကြဲတိုက်ခိုက်နေတယ်လို့ ဆိုပါတယ်။

RFA ရဲ့ စာရင်းတွေအရ အာဏာသိမ်းကာလအတွင်း ပညာရေးဆိုင်ရာ အဆောက်အအုံတွေကို ပစ်မှတ်ထား လေကြောင်းတိုက်ခိုက်မှု အကြိမ် နှစ်ရာနီးပါးရှိခဲ့ပြီး အဲဒီတိုက်ခိုက်မှုတွေကြောင့် တက္ကသိုလ်၊ စာသင်ကျောင်းတွေနဲ့ ဘုန်းတော်ကြီးသင် ပညာရေးကျောင်း ၁၄၆ ကျောင်းအထိ ပျက်စီးခဲ့ရပါတယ်။