နယ်မြေရှင်းလင်းရေးကြောင့် ဆားလင်းကြီးက ဒေသခံတစ်သောင်းကျော် ထွက်ပြေး

စစ်ကောင်စီတပ်ရဲ့ နယ်မြေရှင်းလင်းရေးကြောင့် စစ်ကိုင်းတိုင်း၊ ဆားလင်းကြီးမြို့နယ်၊ ကျေးရွာ (၂၀) နီးပါးက အရပ်သားတစ်သောင်းကျော်ဟာ ဖေဖော်ဝါရီလ ၄ ရက်က ထွက်ပြေးနေရတယ်လို့ ဒေသခံတွေက ပြောပါတယ်။

အင်အား ၁၅၀ နီးပါးရှိတဲ့ စစ်ကောင်စီတပ်သားတွေက ဆားလင်းကြီးမြို့နယ်၊ မြောက်ဘက်ခြမ်းကရွာတွေကို နယ်မြေရှင်းလင်းရေးလုပ်နေတယ်လို့ ဒေသခံတစ်ဦးက ပြောပါတယ်။

ဖေဖော်ဝါရီလ ၃ ရက်မှာလည်း စစ်ကောင်စီတပ်သားတွေက ဆားလင်းကြီး - ညောင်ပင်ကြီး ကားလမ်း ဆားလင်းကြီးမြို့အဝင်မှာ ကျွဲခိုတောရွာဒေသခံ အသက် ၃၀ အရွယ် ကိုမြင့်ဝေကို သေနတ်နဲ့ ပစ်သတ်ခဲ့တယ်လို့ သူက ပြောပါတယ်။ စစ်ကောင်စီတပ်သားတွေက ဘာကြောင့် အခုလို ပစ်သတ်ခဲ့တယ်ဆိုတာ မသိရဘူးလို့ ပြောပါတယ်။

ဖေဖော်ဝါရီလ ၄ ရက် ဒေသခံတွေ ထွက်ပြေးရတဲ့ရွာတွေထဲမှာတော့ ဆားထုံး၊ တောကျောင်း၊ လက်ပံကျွန်း၊ မယ်ဇလီကန်၊ ဒူးထောက်၊ ပိုင်းတောင့်ကြီး၊ ကျောက်မှော်၊ အုတ်ရှစ်ပြား၊ ထန်းပု၊ ထန်းဇင်၊ ခံကုန်း၊ ဘင်္ဂါး စတဲ့ရွာတွေ ပါဝင်ပါတယ်။

ဒီအခြေအနေနဲ့ပတ်သက်ပြီး စစ်ကောင်စီရဲ့ စစ်ကိုင်းတိုင်းပြောခွင့်ရသူ ဦးအေးလှိုင်ကို RFA က ဖေဖော်ဝါရီလ ၄ ရက် ညနေပိုင်းမှာ တယ်လီဖုန်းနဲ့ ဆက်သွယ်မေးမြန်းခဲ့ပေမယ့် လက်ခံဖြေဆိုတာမရှိပါဘူး။

ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးမှူးရုံး (UN OCHA) ရဲ့ ဖေဖော်ဝါရီ ၂ ရက်နေ့ အစီရင်ခံစာမှာတော့ အာဏာသိမ်းပြီးနောက် စစ်ကိုင်းတိုင်းအတွင်း စစ်ဘေးဒုက္ခသည် ခြောက်သိန်းခွဲနီးပါး ရှိတယ်လို့ ဖော်ပြထားပါတယ်။