တောင်တွင်းကြီး NLD တိုင်းလွှတ်တော် ကိုယ်စားလှယ် ဖမ်းဆီးခံထားရ

မကွေးတိုင်း၊ တောင်တွင်းကြီးမြို့နယ် အမျိုးသားဒီမိုကရေစီအဖွဲ့ချုပ် (NLD) ပါတီရဲ့ တိုင်းလွှတ်တော် ကိုယ်စားလှယ် ဦးအောင်ကိုကို မေလ ၉ ရက်နေ့က ရန်ကုန်မြို့မှာ ဖမ်းဆီးခံရလိုက်ရတယ်လို့ ဒေသခံတွေက မေလ ၁၃ ရက် ဒီနေ့မှာ RFA ကို ပြောပါတယ်။

မေလ ၉ ရက်ညနေပိုင်း ရန်ကုန်တိုင်း၊ ထောက်ကြန့်စစ်သင်္ချိုင်းအနီးက စစ်ကောင်စီတပ်ဖွဲ့ရဲ့ စစ်ဆေးရေးအနီးမှာ ဖမ်းဆီးခံလိုက်ရတာလို့ လုံခြုံရေးအရ အမည်မဖော်လိုတဲ့ ဦးအောင်ကိုကိုနဲ့ နီးစပ်သူတစ်ဦးက RFA ကို ပြောပါတယ်။

“ရန်ကုန်ကိုလာပြီးအပြန် အဝေးပြေးလိုင်းကားပေါ်မှာ ဖမ်းဆီးခံလိုက်ရတာ။ အခုချိန်အထိ ဘယ်မှာဖမ်းထားတယ်။ ဘာကြောင့်ဖမ်းတယ်ဆိုတာ အဆက်အသွယ် မရသေးပါဘူး ”

ဦးအောင်ကိုကို ဖမ်းဆီးခံရတဲ့ညမှာပဲ သူ့ရဲ့ဆွေမျိုးတော်စပ်သူ ရန်ကုန်တိုင်း၊ အင်းစိန်မြို့နယ်မှာ နေထိုင်တဲ့ အမျိုးသမီးနှစ်ဦးကိုလည်း စစ်ကောင်စီတပ်သားတွေ ဖမ်းဆီးသွားတယ်လို့ ဆိုပါတယ်။

ထပ်မံဖမ်းဆီးခံလိုက်ရတဲ့ အမျိုးသမီးနှစ်ဦးကိုလည်း ဘယ်မှာဖမ်းဆီးထားတယ်ဆိုတာ မသိရသေးဘူးလို့ ဦးအောင်ကိုကိုနဲ့ နီးစပ်သူက ပြောပါတယ်။

အသက် ၄၃ နှစ်အရွယ် ဦးအောင်ကိုကိုဟာ ၂၀၂၀ ပြည့်နှစ်၊ အထွေထွေရွေးကောက်ပွဲမှာ မကွေးတိုင်း၊ တောင်တွင်းကြီးမြို့နယ် မဲဆန္ဒနယ်အမှတ် (၁) က အနိုင်ရခဲ့တဲ့ ကိုယ်စားလှယ်တစ်ဦးဖြစ်ပါတယ်။

ဦးအောင်ကိုကိုဟာ မကွေးတိုင်းလူငယ်လုပ်ငန်းအဖွဲ့နဲ့ တောင်တွင်းကြီးမြို့နယ် NLD လူငယ်လုပ်ငန်းအဖွဲ့ တွဲဘက်တာဝန်ခံတစ်ဦးလည်းဖြစ်တယ်လို့ ဒေသခံတွေက ပြောပါတယ်။

စစ်တပ်အာဏာသိမ်းပြီးနောက်ပိုင်း NLD ပါတီရဲ့ အနိုင်ရလွှတ်တော်ကိုယ်စားလှယ်တွေ ဖမ်းဆီးခံနေရသလို သူတို့ရဲ့နေအိမ်တွေလည်း ချိပ်ပိတ်ခံနေရတာရှိပါတယ်။

ဖမ်းဆီးခံထားရတဲ့ ကိုယ်စားလှယ်တွေဟာ အကြမ်းဖက်မှုတိုက်ဖျက်ရေးဥပဒေ၊ နိုင်ငံတော်သစ္စာဖောက်ဖျက် ပုန်ကန်မှုကြီး၊ နိုင်ငံတော်အကြည်အညိုပျက်စေမှု စတဲ့ပုဒ်မတွေနဲ့ တရားစွဲဆိုထောင်ချခံနေရတာပါ။

NLD ပါတီရဲ့ ၂၀၂၃ ခုနှစ်၊ ဇန်နဝါရီလ ၅ ရက်နေ့အထိ စာရင်းတွေအရ အာဏာသိမ်းနှစ်နှစ်အတွင်းမှာ ဖမ်းဆီးခံခဲ့ရတဲ့ လွှတ်တော်ကိုယ်စားလှယ် ၁၂၄ ဦးရှိပြီး အဲဒီအထဲက ကိုယ်စားလှယ် ၈၀ ဦးကတော့ ဆက်လက်ဖမ်းဆီးခံထားရဆဲဖြစ်ပါတယ်။