သာယာဝတီထောင်ကနေ အကျဉ်းသား ၂၀၆ ဦး ပြန်လွတ်

ပဲခူးတိုင်း(အနောက်ခြမ်း)၊ သာယာဝတီမြို့ အကျဉ်းထောင်ကနေ မေလ ၃ ရက် ဒီကနေ့ စစ်ကောင်စီရဲ့ လွတ်ငြိမ်းနဲ့ လွတ်မြောက်လာသူတွေထဲမှာ အုတ်​ဖိုမြို့နယ် NLD ပါတီ ပြန်​ကြား​ရေးတာဝန်ခံ ကိုတင်ကိုကိုထွဋ်အပါအဝင် ၂၀၆ ဦး ရှိတယ်လို့ ဒေသခံတွေနဲ့ အကျဉ်းထောင်နဲ့ နီးစပ်သူတွေက ပြောပါတယ်။

လွတ်လာသူတွေထဲမှာ အမျိုးသား ၁၃၀ ဦးနဲ့ အမျိုးသမီး ၇၆ ဦးပါဝင်ပြီး ပြန်လွှတ်မပေးခင်ကတည်းက ခံဝန်ကတိ ထိုးခိုင်းခဲ့တယ်လို့ လွတ်မြောက်လာသူတွေနဲ့ နီးစပ်သူတစ်ဦးက RFA ကို ပြောပါတယ်။

"သာယာဝတီထောင်က မ ၇၆ ဦးနဲ့ ကျား ၁၃၀ ဦး လွတ်တယ်။ မလွတ်ခင် သုံးရက်ကတည်းက ထောင်ထဲမှာ ခံဝန်ထိုးခိုင်းတယ်။ ဘာမှ မလုပ်ရဘူး။ ဘယ်မှ မသွားရဘူး။ အိမ်မှာပဲနေရမယ်။ တစ်ခုခုထပ်လုပ်ရင် တစ်မိသားစုလုံး ဖမ်းမယ်တဲ့"

အဲဒီအထဲမှာ အာဏာဖီဆန်ရေးလှုပ်ရှားမှု (CDM) လုပ်လို့ ပုဒ်မ ၅၀၅-က နဲ့ အကျဉ်းကျနေတဲ့ သာယာဝတီအကျဉ်းထောင်က​ ထောင်ဆရာဝန်​ ​ဒေါက်​တာမျိုးဝင်းညွန့်နဲ့ လက်​ပံတန်းမြို့က မူလတန်ကျောင်းဆရာ ကိုဇင်ဖြိုးကိုတို့လည်းပါတယ်လို့ ဆိုပါတယ်။

စစ်ကောင်စီဟာ ပုဒ်မ ၅၀၅ - က နဲ့ ထောင်ဒဏ်ချမှတ်ခံရသူတွေထဲက ၂၁၅၃ ဦးကို ကဆုန်လပြည့်နေ့ အထိမ်းအမှတ် လူသားချင်းစာနာမှုအရ လွတ်ငြိမ်းခွင့်ပြုလိုက်တယ်လို့ မေလ ၃ ရက် ဒီနေ့မှာ ထုတ်ပြန်ခဲ့ပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ မေလ ၂ ရက်နေ့ စာရင်းတွေအရ စစ်အာဏာသိမ်းပြီးနောက် ဒီမိုကရေစီအရေးလှုပ်ရှားသူနဲ့ ပြည်သူ စုစုပေါင်း ၁၇,၈၉၇ ဦး ဖမ်းဆီးခံထားရဆဲဖြစ်ပါတယ်။