မြန်မာ့အရေး ဖြေရှင်းဖို့ပျက်ကွက်ခဲ့ကြောင်း ကုလအတွင်းရေးမှူးချုပ်ဝန်ခံ

2022.11.14
Share on WhatsApp
Share on WhatsApp
မြန်မာ့အရေး ဖြေရှင်းဖို့ပျက်ကွက်ခဲ့ကြောင်း ကုလအတွင်းရေးမှူးချုပ်ဝန်ခံ နိုဝင်ဘာလ ၁၂ ရက်နေ့က ကမ္ဘောဒီးယားနိုင်ငံ၊ ဖနွမ်းပင်မြို့မှာ ကျင်းပသည့် သတင်းစာရှင်းလင်းပွဲ။
Photo: AFP

မြန်မာ့အရေးနဲ့ ပတ်သက်လို့ နိုင်ငံတကာကရော၊ ကုလသမဂ္ဂဘက်ကပါ ဖြေရှင်းဖို့ ပျက်ကွက်ခဲ့တယ်လို့ ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတားရက်က ဝန်ခံပြောဆိုလိုက်ပါတယ်။

ကမ္ဘောဒီးယားနိုင်ငံမှာ ကျင်းပနေတဲ့ အာဆီယံထိပ်သီးညီလာခံအပြီး ပြီးခဲ့တဲ့ တနင်္ဂနွေနေ့က သတင်းစာရှင်းလင်းပွဲမှာ အတွင်းရေးမှူးချုပ်က ထည့်ပြောခဲ့တာပါ။

မြန်မာပြည်သူတွေ မယုံနိုင်လောက်အောင် ဆိုးရွားတဲ့ ဒုက္ခတွေ ခံစားနေရတယ်လို့လည်း သူကပြောဆိုခဲ့ပါတယ်။

ကုလသမဂ္ဂဟာ မြန်မာ့အရေးနဲ့ ပတ်သက်ပြီး နှုတ်ဆိတ်နေတယ်လို့ နိုင်ငံတကာ မြန်မာ့အရေးလှုပ်ရှားသူတွေက ဝေဖန်နေတဲ့အချိန်မှာ အခုလိုပြောခဲ့တာ ဖြစ်ပါတယ်။

နိုင်ငံရေးအကျဉ်းသားတွေအားလုံးလွတ်မြောက်ဖို့လိုပြီး အကြမ်းဖက်မှုတွေ အမြန်ရပ်တန့်ဖို့ လိုတယ်လို့လည်း သူကဆိုပါတယ်။

လာမယ့်နှစ်အတွက် အာဆီယံ ဥက္ကဋ္ဌရာထူးကို အင်ဒိုနီးရှားနိုင်ငံက ပြောင်းလွှဲလက်ခံယူခဲ့ပါတယ်။

အာဆီယံ ဥက္ကဋ္ဌဖြစ်လာတဲ့ အင်ဒိုနီးရှားနိုင်ငံဟာ မြန်မာ့အရေးနဲ့ ပတ်သက်ပြီး ဆောင်ရွက်နိုင်မယ်လို့ ယုံကြည်ကြောင်းနဲ့ ကုလသမဂ္ဂကလည်း ပူးပေါင်းသွားမယ်လို့ အန်တိုနီယို ဂူတားရက်ကပြောပါတယ်။

မြန်မာနိုင်ငံဆိုင်ရာ ကုလကိုယ်စားလှယ်ဟာ အာဆီယံဆိုင်ရာ မြန်မာအထူးကိုယ်စားလှယ်နဲ့ပေါင်းပြီး မြန်မာပြည်ဒီမိုကရေစီလမ်းကြောင်းပေါ် အမြန်ပြန်ရောက်အောင် ကြိုးစားလုပ်သွားမယ်လို့လည်း ဆိုပါတယ်။

အမေရိကန် သမ္မတ ဂျိုးဘိုင်ဒင်ကလည်း မြန်မာ့ဒီမိုကရေဏီရေး ဆက်ကြိုးစားသွားမှာ ဖြစ်သလို၊ အာဆီယံကချမှတ်ထားတဲ့ ဘုံသဘောတူညီချက်တွေကို လိုက်နာဖို့ မြန်မာစစ်ကောင်စီကို မနေ့က တိုက်တွန်းခဲ့ပါတယ်။

ဘုံသဘောတူညီချက်တွေ ချမှတ်ထားတာ တစ်နှစ်ခွဲကျော်ပြီဖြစ်ပေမယ့် စစ်တပ်ဘက်က လိုက်နာတာ မရှိလို့ အချိန်အတိုင်းအတာတစ်ခု ကန့်သတ်ဖို့လည်း ဒီတစ်ခေါက် ညီလာခံကနေ အာဆီယံခေါင်းဆောင်တွေ ဆုံးဖြတ်ခဲ့ပါတယ်။

အာဏာသိမ်း စစ်ကောင်စီဘက်ကတော့ အာဆီယံအနေနဲ့ မြန်မာပြည်တွင်းရေးကို ဝင်ရောက်မစွက်ဖက်ဖို့ ထိပ်သီးညီလာခံကျင်းပနေချိန်မှာ သဘောထား ထုတ်ပြန်ခဲ့ပါတယ်။


မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။