ရေဦးမြို့မှာ NLD အမတ်နေအိမ် အပါအဝင် အိမ်သုံးလုံး ချိတ်ပိတ်ခံရ

2022.01.14
Share on WhatsApp
Share on WhatsApp
ရေဦးမြို့မှာ NLD အမတ်နေအိမ် အပါအဝင် အိမ်သုံးလုံး ချိတ်ပိတ်ခံရ စစ်ကောင်စီတပ် ချိတ်ပိတ်ထားတဲ့ ရေဦးမြို့က နေအိမ်တစ်လုံးကို ၂၀၂၂ ဇန်နဝါရီ ၁၄ ရက်နေ့က တွေ့ရစဉ်
Photo: CJ

စစ်ကိုင်းတိုင်း ရေဦးမြို့ အမျိုးသားဒီမိုကရေစီအဖွဲ့ချုပ် (NLD) ပါတီ ပြည်သူ့လွှတ်တော် ကိုယ်စားလှယ် ဒေါက်တာ မင်းသိန်းရဲ့ နေအိမ်အပါအဝင် နေအိမ် သုံးလုံးကို စစ်ကောင်စီက ဇန်နဝါရီလ ၁၃ ရက် မနေ့ ညနေပိုင်း လာရောက်ချိတ်ပိတ်သွားတယ်လို့ ဒေသခံတွေက ပြောပါတယ်။

ပြည်သူ့ကာကွယ်ရေးတပ်ဖွဲ့ (PDF) တွေနဲ့ ဆက်နွယ်မှု ရှိတယ်ဆိုတဲ့ စွပ်စွဲချက်နဲ့ မနေ့ ညနေ ၅ နာရီခွဲ လောက် စစ်ကောင်စီတပ်သားတွေနဲ့ ပူးပေါင်းအဖွဲ့တွေက လာရောက် ချိတ်ပိတ်သွားတာလို့ ဒေသခံတစ်ဦးက RFA ကို ပြောပါတယ်။

“မနေ့က ညနေလောက်လာပြီး ချိတ်ပိတ်ကြတာ၊ ဒေါက်တာမင်းသိန်းတို့၊ ဦးဇော်မင်းထွန်း တို့ဆိုတာက မြို့မှာ မရှိကြဘူး၊ သူတို့တိမ်းရှောင်နေကြတာကြာပြီ”

အပိတ်ခံရတဲ့ အိမ်တွေက ရေဦးမြို့ အောင်ဆန်းရပ်ကွက် ၄ လမ်းက ဒေါက်တာ မင်းသိန်းရဲ့နေအိမ်၊ ၃ လမ်းက NLD ပါတီထောက်ခံသူ ဦးဇော်မင်းထွန်းရဲ့နေအိမ်နဲ့ ရေဦး - ဒီပဲယင်းလမ်းပေါ်က ပြည်သူတစ်ဦးရဲ့ နေအိမ်တွေ ဖြစ်တယ်လို့ ဆိုပါတယ်။

ဇန်နဝါရီလ ၁၂ ရက်နေ့ကလည်း ဒီပဲယင်းမြို့နယ် တိုင်းလွှတ်တော်ကိုယ်စားလှယ် ဒေါ်နှင်းခိုင်စိုးရဲ့ နေအိမ်ကို စစ်ကောင်စီဘက်က လာရောက်ချိတ်ပိတ်ခဲ့သလို ရေဦးမြို့နယ် တိုင်းလွှတ်တော်ကိုယ်စားလှယ် ဦးမြင့်ထွေးရဲ့ နေအိမ်လည်း ပြီးခဲ့တဲ့ အောက်တိုဘာလ ကတည်းက ချိတ်ပိတ်ခံထားရပါတယ်။

စစ်တပ်က အာဏာသိမ်းတဲ့ ဖေဖော်ဝါရီလ ၁ ရက်နေ့ကနေ ဒီဇင်ဘာလ ၃၁ ရက်ထိ နေအိမ်နဲ့ အဆောက်အအုံ ချိတ်ပိတ်ခံထားရတဲ့ NLD ပါတီဝင်၊ လွှတ်တော်ကိုယ်စားလှယ်နဲ့ ပါတီဝန်းရံတဲ့ ပြည်သူ စုစုပေါင်း ၇၇ ဦးရှိပြီလို့ NLD ပါတီက ဇန်နဝါရီလ ၁ ရက်နေ့မှာ သတင်းထုတ်ပြန်ထားပါတယ်။

မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။

COMMENTS

ဆိုက်တခုလုံးသို့