ဘုန်းကြီးကျောင်းမှာ ဝင်ပုန်းတဲ့ အရပ်သား ၃ဝ ကျော် အစုလိုက်အပြုံလိုက် သတ်ဖြတ်ခံရ

ကျော်လွင်ဦး (ဝါရှင်တန်ဒီစီ)
2024.05.11
ဘုန်းကြီးကျောင်းမှာ ဝင်ပုန်းတဲ့ အရပ်သား ၃ဝ ကျော် အစုလိုက်အပြုံလိုက် သတ်ဖြတ်ခံရ စစ်ကိုင်းတိုင်း မြင်းမူမြို့နယ် လက်ထုတ္တောကျေးရွာတွင် စစ်ကောင်စီစစ်ကြောင်းမှ သတ်ဖြတ်သွားသည့် အရပ်သား ၃၀ ကျော်အား ၂၀၂၄ ခုနှစ် မေလ ၁၁ ရက်နေ့က တွေ့ရစဉ်။
Citizen Journalist

မြင်းမူမြို့နယ် လက်ထုတ္တောကျေးရွာကို မေလ ၁၁ ရက်နေ့မနက်မှာ စစ်ကောင်စီစစ်ကြောင်းတွေ ဝင်ရောက် ပစ်ခတ်ချိန်မှာ ဘုန်းကြီးကျောင်းထဲ ဝင်ပုန်းနေတဲ့ အရပ်သား ၃၁ ယောက်ကို ခေါ်ထုတ်ပြီး သတ်ဖြတ်သွားတယ်လို့ အဲဒီနေရာကို ရောက်ရှိနေတဲ့ ဒေသအခြေစိုက် ပြည်သူ့ကာကွယ်ရေး တပ်ဖွဲ့ဝင်တွေနဲ့ ဒေသခံတချို့က ပြောပါတယ်။

"တချို့က ဘုန်းကြီးကျောင်းတွေထဲ ပြေးကြတာ၊ အဲဒီအချိန်မှာ ဘုန်းကြီးကျောင်းတွေထဲကဟာတွေကို ခေါ်ထုတ်ပြီး အမျိုးသားတွေကို အကုန်လုံး ထိုင်ခိုင်းပြီး တစ်ယောက်မကျန် ပစ်သတ်သွားတာ"

တိုက်ပွဲဖြစ်ပွားတာမရှိဘဲ စစ်ကောင်စီစစ်ကြောင်းက ဝင်ရောက်ပစ်ခတ်သွားတာလို့ လုံခြုံရေးအရ အမည်မဖော်လိုတဲ့ ဒေသခံတစ်ဦးက RFA ကို ပြောပါတယ်။

"ကျား ၃၁ ဦးနဲ့ မ တစ်ဦး သတ်သွားတယ်၊ ဒဏ်ရာရသူက ခြောက်ဦးရှိပါတယ်၊ တိုက်ပွဲဖြစ်တာတော့ မရှိဘူး၊ စစ်ကြောင်းထိုးရင်းနဲ့ တွေ့လို့ပစ်သွားတာ"

အဲဒီရွာကို ရောက်ခဲ့တဲ့ မြောင်မြို့နယ် ပြည်သူ့ကာကွယ်ရေးနဲ့ လုံခြုံရေးအဖွဲ့ CDSOM တာဝန်ရှိသူ ကိုနွေဦးက ဘုန်းကြီးကျောင်းမှာရှိနေတဲ့ အရပ်သားတွေကို စစ်ကောင်စီတပ်သားတွေက ခေါ်ထုတ်ပြီး ပစ်သတ်သွားတာလို့ ပြောပါတယ်။

"ဝင်ကတည်းက လက်နက်ကြီးတွေရော လက်နက်ငယ်တွေရော မပြတ်တမ်းပစ်တယ်၊ ပစ်တဲ့အတွက်ကြောင့် ပြည်သူတွေက ရှောင်ကြတိမ်းကြရင်းနဲ့ တချို့က ဘုန်းကြီးကျောင်းတွေထဲ ရှောင်ကြတာ၊ ပြေးကြတာ၊ အဲဒီအချိန်မှာ ဘုန်းကြီးကျောင်းတွေထဲကဟာတွေကို ခေါ်ထုတ်ပြီး အမျိုးသားတွေကို အကုန်လုံး ထိုင်ခိုင်းပြီး တစ်ယောက်မကျန် ပစ်သတ်သွားတာ၊ ကျွန်တော်အဲဒီမှာ ရှိနေတဲ့အချိန်တုန်းက တွေ့ရတဲ့အလောင်းက အနောက်ဘက် ဘုန်းကြီးကျောင်းက ငါးယောက်၊ အရှေ့ဘက် ဘုန်းကြီးကျောင်းက ၂၃ ယောက်၊ လမ်းပေါ်မှာ အသတ်ခံရတာက တစ်ယောက်"

အဲဒီပစ်ခတ်သတ်ဖြတ်မှုမှာတော့ မြောင်လမ်းပေါ်မှာရှိတဲ့ စစ်တပ်အထိုင်စခန်းက စစ်ကောင်စီတပ်သားတွေ၊ ချောင်းဦးမြို့နယ် နတ်ရေကန်အထိုင်စခန်းက တပ်သားတွေနဲ့ လက်ထုတ္တောရွာမျက်နှာချင်းဆိုင်က ဂွေးပင်တောရွာမှာရှိတဲ့ စစ်တပ်အထိုင်စခန်းက တပ်သားတွေ စတဲ့ နေရာသုံးခုက စစ်ကောင်စီတပ်ဖွဲ့တွေ ပါဝင်တယ်လို့ သူက ဆက်ပြောပါတယ်။

"PDF တွေ နေတဲ့နေရာကိုမေးတာပေါ့နော်၊ ဘယ်နေရာမှာနေလဲဆိုတာ မေးတာ၊ မေးတဲ့အချိန်မှာ နေရာကိုတော့မသိပါဘူးလို့ပြောလိုက်တဲ့အချိန်မှာ သူတို့ကို အကုန်ပစ်သတ်လိုက်တာ"

ဒီသေဆုံးသူတွေထဲမှာ လက်ထုတ္တောရွာခံ အများစုဖြစ်ပြီး သုံးဦးကတော့ ဘုန်းကြီးကျောင်း အဆောင်သစ် လာဆောက်ပေးနေတဲ့ ဝမ်းပြည့်ရွာက ပန်းရံအလုပ်သမား လေးဦးထဲက သုံးဦးလည်း ပါဝင်ပါတယ်။

စစ်ကောင်စီတပ်သားတွေက အရပ်သားတွေကို မသေမချင်း ပစ်သတ်ခဲ့တာလို့လည်း ကိုနွေဦးက ပြောပါတယ်။

"PDF တွေ နေတဲ့နေရာကိုမေးတာပေါ့နော်၊ ဘယ်နေရာမှာနေလဲဆိုတာ မေးတာ၊ မေးတဲ့အချိန်မှာ နေရာကိုတော့မသိပါဘူးလို့ပြောလိုက်တဲ့အချိန်မှာ သူတို့ကို အကုန်ပစ်သတ်လိုက်တာ၊ ပစ်သတ်တဲ့အချိန်မှာ ခြေထောက်လှုပ်တာတွေရှိတာပေါ့၊ ခြေထောက်လှုပ်ရင်းလည်း ဒီကောင်တွေ ခြေထောက်လှုပ်နေသေးတယ်ဆို ထပ်ပစ်တယ်၊ ခေါင်းလှုပ်ရင်လည်း ခေါင်းကို ထပ်ပစ်တယ်၊ အဲဒါကို ပစ်သတ်ခံရတဲ့အထဲမှာ ကံကောင်းထောက်မစွာနဲ့ လူသေအလောင်းတွေရဲ့ အောက်ဆုံးမှာ အထပ်ခံရတဲ့လူက သူက သေနတ်တော့မှန်တယ် မသေခဲ့ဘူး၊ မသေခဲ့တဲ့သူက ပြန်ပြောတာပေါ့နော်"

အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာန အမှတ် (၁) စစ်ဒေသ ထုတ်ပြန်ချက်နဲ့ ဒေသခံတချို့ ပြောဆိုချက်အရ အဲဒီသတ်ဖြတ်မှုကြောင့် နေရာမှာတင်သေဆုံးသူ ၃၁ ယောက်ရှိပြီး ထိခိုက်ဒဏ်ရာရသူတွေကို ဆေးရုံပို့ဆောင်စဉ် လမ်းမှာ နောက်ထပ်တစ်ဦး သေဆုံးသွားတာကြောင့် သေဆုံးသူ စုစုပေါင်း ၃၂ ယောက်ရှိပါတယ်။

အဲဒီထဲမှာ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီဝင်အချို့လည်း ပါဝင်ပြီး အမျိုးသမီးတွေအပါအဝင် လူ ၂၀ ခန့်ကို ဖမ်းဆီးခေါ်ဆောင်သွားတယ်လို့လည်း NUG ထုတ်ပြန်ချက်မှာ ဖော်ပြထားပါတယ်။ ဒေသခံတစ်ဦးပြောပြတာကတော့ ဖမ်းခေါ်သွားသူတွေထဲ ၁၇ ယောက်ကိုတော့ ပြန်လွှတ်လိုက်တယ်လို့ ဆိုပါတယ်။ ဒီအချက်အလက်တွေနဲ့ပတ်သက်လို့ RFA အနေနဲ့ သီးခြားအတည်မပြုနိုင်သေးပါဘူး။

စစ်ကိုင်းတိုင်း မြင်းမူမြို့နယ် လက်ထုတ္တောကျေးရွာတွင် စစ်ကောင်စီစစ်ကြောင်းမှ သတ်ဖြတ်သွားသည့် အရပ်သား ၃၀ ကျော်အား သယ်ဆောင်နေသည်ကို ၂၀၂၄ ခုနှစ် မေလ ၁၁ ရက်နေ့က တွေ့ရစဉ်။ (Photo: Citizen Journalist)
စစ်ကိုင်းတိုင်း မြင်းမူမြို့နယ် လက်ထုတ္တောကျေးရွာတွင် စစ်ကောင်စီစစ်ကြောင်းမှ သတ်ဖြတ်သွားသည့် အရပ်သား ၃၀ ကျော်အား သယ်ဆောင်နေသည်ကို ၂၀၂၄ ခုနှစ် မေလ ၁၁ ရက်နေ့က တွေ့ရစဉ်။ (Photo: Citizen Journalist)

ဒီသတ်ဖြတ်မှုဟာ စစ်ကောင်စီက စစ်ရာဇဝတ်မှု ထပ်မံကျူးလွန်တာလို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာန ဒုတိယအတွင်းဝန် ဦးမောင်မောင်ဆွေက ပြောပါတယ်။

"အကြမ်းဖက်စစ်ကောင်စီက စစ်ကြောင်းတွေ ထိုးလာတိုင်း ပြည်သူလူထုကို အဲဒီလိုပဲ လူမဆန်စွာရက်ရက်စက်စက် စစ်ရာဇဝတ်မှု ကျူးလွန်တာပါ၊ မြင်းမူမှာလည်း ပြည်သူလူထုတွေကို သတ်ဖြတ်ပြီး စစ်ရာဇဝတ်မှုကျူးလွန်တာ တွေ့ရပါတယ်၊ အဲကိစ္စနဲ့ပတ်သက်ပြီး ကျွန်တော်တို့ အမျိုးသားညီညွတ်ရေးအစိုးရအနေနဲ့ သက်ဆိုင်ရာ ဝန်ကြီးဌာနတွေက လုပ်သင့်လုပ်ထိုက်တာတွေကို လုပ်ဆောင်နေပါတယ်"

ဒီသတ်ဖြတ်မှုမှာ မြင်းမူမြို့နယ်၊ ဂွေးပင်တောရွာ ဘုန်းကြီးကျောင်းမှာအခြေချနေတဲ့ အမှတ်-၁၃ ခြေမြန်တပ်ရင်း (ခမရ-၁၃)၊ အမှတ်-၉၀၉ စစ်မြေပြင် အင်ဂျင်နီယာတပ်ရင်း (စအရ-၉၀၉)၊ စစ်မှုထမ်းဟောင်းတွေနဲ့ ဖွဲ့စည်းထားတဲ့ လှုပ်ရှားတပ်ဖွဲ့၊ ပျူစောထီး ပူးပေါင်းအင်အား (၄၀) ခန့်၊ ချောင်းဦးမြို့နယ်၊ နတ်ရေကန်ရွာက အမှတ်-၉၂၉ ထောက်ပံ့နဲ့ ဆက်သွယ်ရေးတပ်ရင်း (ထပရ-၉၂၉) ပူးပေါင်းအင်အား (၃၀) ခန့် စတဲ့တပ်တွေ ပါဝင်တယ်လို့ NUG က ထုတ်ပြန်ထားပါတယ်။

အခုလိုအရပ်သားတွေ သတ်ဖြတ်ခံရတာနဲ့ ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်း နဲ့ စစ်ကိုင်းတိုင်း ပြောရေးဆိုခွင့်ရှိသူ လူမှုရေးဝန်ကြီး ဦးညွန့်ဝင်းအောင်ကို RFA က ဖုန်းနဲ့ဆက်သွယ်ခဲ့ပေမဲ့ လက်ခံဖြေဆိုတာ မရှိပါဘူး။

မေလ ၉ ရက်နေ့ကလည်း မကွေးတိုင်း၊ ဆောမြို့နယ်၊ အကြည်ပန်းပလွန်းရွာမှာ စစ်ကောင်စီရဲ့ လေကြောင်းတိုက်ခိုက်မှုကြောင့် အရပ်သား အနည်းဆုံး ၁၆ ဦးသေဆုံးခဲ့ပါတယ်။

အာဏာသိမ်းပြီးနောက် လက်နက်ကိုင်ပဋိပက္ခတွေမှာ အရပ်သားတွေအပေါ် ကျူးလွန်ခဲ့တဲ့ အစုလိုက် အပြုံလိုက် သတ်ဖြတ်ခံရမှု ၂၂ ခုထက်မနည်း ဖြစ်ပွားခဲ့ပြီး အဲဒီသတ်ဖြတ်မှုတွေမှာ အရပ်သား ၅ဝ၂ ဦးထက်မနည်း သေဆုံးခဲ့တယ်လို့ မြန်မာ့မဟာ ဗျူဟာနဲ့ မူဝါဒရေးရာ လေ့လာရေး အင်စတီကျု (ISP-Myanmar) က ၂၀၂၃ ခုနှစ် အောက်တိုဘာလ ၁၅ ရက်နေ့မှာ ထုတ်ပြန်ထားပါတယ်။

မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။