ရခိုင်မှာ လေးရက်အတွင်း လက်နက်ကြီးကြောင့် ကလေးနှစ်ဦးသေဆုံး၊ ခုနစ်ဦးဒဏ်ရ

2022.09.26
Share on WhatsApp
Share on WhatsApp
ရခိုင်မှာ လေးရက်အတွင်း လက်နက်ကြီးကြောင့် ကလေးနှစ်ဦးသေဆုံး၊ ခုနစ်ဦးဒဏ်ရ ကျောက်တော်မြို့နယ် နဂရာရွာမှာ လက်နက်ကြီးကျည် ကျရောက် ပေါက်ကွဲသဖြင့် ထိခိုက်ပျက်စီးသွားသည့် နေအိမ်ကို ၂၀၂၂ ခုနှစ် စက်တင်ဘာလ ၂၅ ရက်နေ့က တွေ့ရစဉ်။
Photo: Ann Thar Gyi

စစ်ကောင်စီတပ်နဲ့ ရက္ခိုင့်တပ်တော် (AA) တို့ တစ်ကျော့ပြန်တိုက်ပွဲတွေ ပြင်းထန်နေတဲ့ ရခိုင်ပြည်နယ်မှာ စက်တင်ဘာ ၂၃ ရက်နေ့ကနေ ဒီနေ့အထိ လေးရက်အတွင်း စစ်ကောင်စီ တပ်က ပစ်ခတ်တဲ့ လက်နက်ကြီးကြောင့် ကလေးနှစ်ဦးသေဆုံးပြီး ခုနစ်ယောက် ဒဏ်ရာ ရရှိတယ်လို့ ဒေသခံတွေက ပြောပါတယ်။

ကျောက်တော်မြို့နယ် နဂရာရွာမှာ စက်တင်ဘာလ ၂၅ ရက်ညက လက်နက်ကြီးကျည် ကျရောက် ပေါက်ကွဲလို့ အသက် ခုနှစ်နှစ်အရွယ် မောင်ကြီး (ခေါ်) မောင်ကိုနိုင်သေဆုံးခဲ့ပြီး ဒေသခံဦးကျော်စိန် ဒဏ်ရာရသွားတယ်လို့ မိသားစုဝင်တွေက ပြောပါတယ်။ ည ၁၁ နာရီ လောက်မှာ ကျောက်တော်မြို့ အနားမှာရှိတဲ့ အမှတ် (၉) စစ်ဆင်ရေးကွပ်ကဲမှု ဌာနချုပ်ဘက်က ပစ်ခဲ့တာလို့ လုံခြုံရေးအရ အမည်မဖော်လိုသူတစ်ဦးက RFA ကိုပြောပါတယ်။

“ဖြစ်တာက အဲဒီတပ်မက ပစ်လိုက်လို့ ၁၁ နာရီ ဝန်းကျင်လောက်မှာ အိမ်မှာကျပြီး ကွဲတယ်။ ခေါင်မိုးကို ဖောက်ပြီးကျတာ။ ရွာထဲကိုတော့ အဲဒီတစ်လုံးပဲကျတာ။ ကျောက်တော် မြစ်ကမ်းနားတစ်လျှောက်မှာတော့ လက်နက်ကြီး အလုံး ၃၀ လောက် ကျတယ်”

ကလေးကို စက်တင်ဘာ ၂၆ ရက်မှာ သင်္ဂြိုဟ်ခဲ့ပြီး ဒဏ်ရာသူကတော့ ဆေးကုသနေရ ပါတယ်။ ဒေသခံတချို့ကတော့ နီးစပ်ရာရွာတွေကို ထွက်ပြေးနေရပါတယ်။

နဂရာရွာမှာ ဒီလ ၂၁ ရက်နေ့ ညနေပိုင်းကလည်း တိုက်ပွဲဖြစ်တာမရှိဘဲ စကခ (၉) ကပစ်တဲ့ လက်နက်ကြီးကျည် ကျရောက်ပေါက်ကွဲတာကြောင့် မိသားစုလေးဦး ဒဏ်ရာရခဲ့ပါတယ်။

အလားတူ စက်တင်ဘာ ၂၄ ရက်နေ့က ကျောက်တော်မြို့ ရွာမရပ်ကွက်ထဲမှာရှိတဲ့ သိန်းဆန်းတည်းခိုခန်းကို လက်ကြီးကျည် ကျရောက်ပေါက်ကွဲခဲ့တာကြောင့် တည်းခိုနေတဲ့ အမျိုးသားတစ်ဦး ဒဏ်ရာရခဲ့ပါတယ်။

"စစ်တွေဘက်က လေယာဉ်တစ်စီး ရောက်လာတယ်။ တဝဲဝဲပျံနေတယ်။"

စက်တင်ဘာ ၂၆ ရက်နေ့ မှာလည်း မင်းပြားမြို့နယ် ခေါင်းလောင်းချောင်းရွာမှာ စစ်ကောင်စီတပ်ပိုင် စစ်သင်္ဘောက ပစ်လိုက်တဲ့ လက်နက်ကြီးကျည် ကျရောက် ပေါက်ကွဲတဲ့အတွက် အသက် ၂၁ နှစ်အရွယ် အမျိုးသမီးတစ်ဦးနဲ့ အသက် ၁၀ နှစ်အရွယ် ကလေးနှစ်ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

စစ်တွေကနေ မင်းပြားမြို့ကို မြစ်ကြောင်းအတိုင်း တက်လာတဲ့ စစ်သင်္ဘောနှစ်စီးကို ခေါင်းလောင်းချောင်းရွာနဲ့ လောင်းရှည်ရွာကြားမှာ AA က ကြားဖြတ်တိုက်ခိုက်ချိန် နှစ်ဖက်တိုက်ပွဲဖြစ်ပြီး အခုလို အပစ်ခံရတာလို့ ဒေသခံတွေက ပြောပါတယ်။

အဲဒီနောက် စစ်ကောင်စီတပ်က လေကြောင်းရော ရေကြောင်းကပါ လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တယ်လို့ အဲဒီအနားမှာရှိတဲ့ သတ်ပုန်းချောင်း ရွာသား တစ်ဦးက RFA ကိုပြောပါတယ်။

“မနက် ၉ နာရီလောက်က စစ်တွေဘက်ကနေ ဇက်ရေယာဉ်တက်လာတယ်။ ကျနော်တို့ သတ်ပုန်းရွာနားကို ရောက်တဲ့အခါ စစ်တွေဘက်က လေယာဉ်တစ်စီး ရောက်လာတယ်။ တဝဲဝဲပျံနေတယ်။ ခေါင်းလောင်းချောင်း ရွာနားရောက်တာနဲ့ တိုက်ပွဲဖြစ်တယ်လို့ ကြားရတယ်။ Navy (ရေတပ်) ကို AA က ပစ်လိုက်တယ်ထင်တယ်။ နှစ်စီးလုံးမှာ ထိတယ်။ ပစ်သံတော့ ကျနော်တို့ကြားရတယ်။ နောက်ကလိုက်ပါလာတဲ့ လေယာဉ်ကလည်း ပစ်ကူပေးတယ်”

ခေါင်းလောင်းချောင်းရွာကနေ မင်းပြားမြို့အထိ မြစ်ကြောင်းတစ်လျှောက် ပစ်ခတ်ခဲ့သလို မင်းပြားမြို့ပေါ် ကျိန်းတောင်ဘုရားမှာရှိတဲ့ တပ်စခန်းကနေလည်း လက်နက်ကြီးတွေနဲ့ ပစ်ခတ်နေတယ်လို့ ဆိုပါတယ်။

စက်တင်ဘာလ ၂၃ ရက်နေ့ကလည်း ဘူးသီးတောင်မြို့နယ် နယ်ခြားစောင့်တပ် နခခ (၈) ကနေ သပိတ်တောင် ရွာဘက်ကို လက်နက်ကြီးနဲ့ ပစ်ခဲ့တာကြောင့် အတွင်းငှက်သေရွာက ခုနှစ်နှစ်အရွယ် ကလေးတစ်ဦး သေဆုံးပြီး သပိတ်တောင် မြောက်ရွာက ဒေသခံနှစ်ဦး ဒဏ်ရာရခဲ့ပါတယ်။

လွှတ်တော် ကိုယ်စားလှယ်ဟောင်း ဝါရင့်နိုင်ငံရေးသမား ဦးဖေသန်းကတော့ စစ်ကောင်စီ တပ်ဟာ ပြည်သူတွေကို ဦးတည် တိုက်ခိုက်နေတာ မဖြစ်သင့်ဘူးလို့ ဝေဖန်ပါတယ်။

“ကျနော်တို့ မြင်လာရတာကတော့ ရခိုင်ပြည်နယ်အနှံ့တိုက်ပွဲတွေ ပြင်းထန်လာတာနဲ့ အမျှ လူထုကို ဦးတည်ပြီးတော့ အနီးအနားမှာ တိုက်ပွဲဖြစ်သည်ဖြစ်စေ၊ မဖြစ်သည် ဖြစ်စေ ရွာမှာတော့ စစ်ကောင်စီတပ်က ထင်တိုင်းလုပ်နေတာပဲ။ ပြည်သူတွေလည်း ဒုက္ခသည် ရောက်နေကြတယ်ပေါ့။ တစ်နည်းအားဖြင့် ကြွတ်မနိုင်ကျီကို မီးရှို့သလိုမျိုး ပေါ့နော်။ တိုက်ပွဲတွေက ပြည်သူ့ဘက်ကို ဦးတည်လာတယ်။ ဒါတွေဟာ တပ်မတော် တစ်ရပ်အနေနဲ့ မလုပ်သင့်ဘူးလို့ ပြောလိုပါတယ်”

airstrike-rakhine
မင်းပြားမြို့မှာ စစ်ရဟတ်ယာဉ်တစ်စီး ပျံဝဲနေသည်ကို ၂၀၂၂ ခုနှစ် စက်တင်ဘာလ ၂၅ ရက်နေ့က တွေ့ရစဉ်။ (Photo: Hantar)

နှစ်ဖက်တိုက်ပွဲတွေ ဒီထက်ပို ပြင်းထန်ကျယ်ပြန့်လာနိုင်တာကြောင့် ပြည်သူတွေ ပိုပြီး သတိထား နေထိုင်ဖို့ လိုအပ်တယ်လို့လည်း ဆိုပါတယ်။

ရခိုင်တိုက်ပွဲ အခြေအနေနဲ့ ပတ်သက်ပြီး AA ရော စစ်ကောင်စီဘက်ကပါ တစ်စုံတစ်ရာ သတင်းထုတ်ပြန်တာ မရှိသေးသလို စစ်ကောင်စီရဲ့ ရခိုင်ပြည်နယ်ပြောခွင့်ရသူကို RFA ကမေးမြန်းဖို့ ကြိုးစားခဲ့ပေမယ့် ဖုန်းလက်ခံ ဖြေကြားတာ မရှိပါဘူး။

ဒါပေမဲ့ စက်တင်ဘာ ၂၀ ရက်နေ့က နေပြည်တော်မှာ ပြုလုပ်တဲ့ စစ်ကောင်စီ သတင်းစာ ရှင်းလင်းပွဲမှာ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက ရခိုင်မှာ အသိမ်းခံရတဲ့ စခန်းတွေကို ပြန်လည်ရယူဖို့ လုပ်ဆောင်မယ်လို့ ပြောဆိုထားပါတယ်။

AA ကလည်း စစ်ကောင်စီတပ်က ထိုးစစ်ဆင်လာရင် တန်ပြန်ချေမှုန်းသွားမယ်လို့ စက်တင်ဘာလ ၁၉ ရက်နေ့ အွန်လိုင်းကလုပ်တဲ့ သတင်းစာရှင်းလင်းပွဲမှာ AA ပြောခွင့်ရ ခိုင်သုခက ပြောထားပါတယ်။

ရခိုင်ပြည်နယ်မှာ တစ်ကျော့ပြန် နှစ်ဖက်တိုက်ပွဲတွေအတွင်း စစ်ကောင်စီဘက်က လက်နက်ကြီးကြောင့် မြောက်ဦး၊ ကျောက်တော်၊ မင်းပြား၊ ဘူးသီးတောင် စတဲ့မြို့တွေမှာ ကလေးသုံးဦးနဲ့ ဒေသခံ သုံးဦးသေဆုံးခဲ့ပြီး ထိခိုက်ဒဏ်ရာရသူ ၁၈ ဦးအထိရှိပြီဖြစ်ပါတယ်။

မှတ်ချက်ပေးပို့ရန်

မှတ်ချက်များကို အောက်ပါ ပုံစံတွင် ရေးသားနိုင်ပါသည်။ RFA ၏ အသုံးပြုခြင်းဆိုင်ရာ စည်းမျဉ်းစည်းကမ်းများနှင့် အညီ လိုအပ်လျှင် တည်းဖြတ်ပြီး ဖော်ပြပါမည်။ မှတ်ချက်များကို ရေးပြီးပြီးချင်း ချက်ခြင်း မြင်ရမှာ မဟုတ်ပါ။ တင်ပြထားသော မှတ်ချက်ပါ အကြောင်းအရာများ အတွက် RFA မှာ တာဝန်မရှိပါ။ ကျေးဇူးပြု၍ တခြား မှတ်ချက်ရေးသူများ၏ အမြင်ကို လေးစားပြီး အကြောင်းအရာကိုသာ အဓိကထား ရေးသားစေလိုပါသည်။